Apoiante Kandidatu Prezidente Repúblika, Francisco Guteres 'Lu Olo', bainhira halo kampaña iha Becora, segunda (14 marsu 2022). Imajen Tatoli/Antonio Dasiparu.

DILI, 27 abríl 2022 (TATOLI)—Diretór Nasionál Komisaun Nasionál Eleisaun (CNE-sigla portugés), Adelino de Oliveira Maia, hateten ofisiál CNE hahú halo limpeza ba atributu kandidatu Prezidente Repúblika (PR) José Ramos Horta ho Francisco Guterres ‘Lú Olo’ iha territóriu Dili.

“Hahú ohin, ami-nia ekipa CNE munisípiu Dili halo limpeza ba pamfletu no atributu kandidatu Prezidente Repúblika na’in-rua iha kapitál Dili nian,” Diretór Nasionál Komisaun Nasionál Eleisaun (CNE-sigla portugés) ne’e hateten ba Agência TATOLI, via telefónika, kuarta ne’e.

Iha limpeza ne’e, ofisiál CNE fahe ba ekipa tolu mak ekipa dahuluk halo limpeza hosi postu administrativu Cristo Rei, ekipa daruak kobre postu administrativu Na’in Feto no Vera Crus no ekipa datoluk sei kobre iha postu administrative Don Aleixo nian.

“Ha’u hanoin ekipa tolu ne’e limpeza lalais parese to’o lorokraik hotu ona, tanba atributu kandidatu na’in-rua nian la barak hanesan primeira volta nian nune’e ohin dadeer to’o lorokraik bele hamoos hotu,” nia dehan.

Bainhira hamoos hotu atributu kandidatu PR nian, sei aprezenta depois sei halo relatóriu ida hafoin destroi maibé ida-ne’e seidauk hatene.

Bazea ba Dekretu Governu Númeru 3/2022, 10 janeiru, hateten depois eleisaun hotu semana ida fó biban atu reprezentante kandidatu sira atu hamoos atributu kampaña durante loron 15, entaun iha períodu ne’e reprezenta la hamoos ka la hasai atributu iha espasu públiku mak CNE halo koordenasaun ho entidade relevante liu-liu seguransa sira, nune’e ohin CNE hahú halo limpeza ba atributu kandidatu iha kapitál.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here