Vasina Datolu Pfizer Booster. Imajen Tatoli/Francisco Sony

DILI, 26 abríl 2022 (TATOLI)— Populasaun hamutuk 26.000 iha Munisípiu Dili simu ona vasina Booster Pfizer. Vasina ne’e simu hodi hasae liu tan imunidade hasoru moras COVID-19 iha ita-nia rain Timor-Leste (TL).

Deklarasaun dadus ne’e fo sai husi Diretora Servisu Saúde Munisípiu Dili, Agostinha Segurado  ba Tatoli, iha  nia kna’ar fatin, Bairro Formoza, ohin.

“Vasina Booster Pfizer  ita implementa hahú iha janeiru too agora ema hamutuk 26.000  mak simu ona.  Liu husi simu vasina  ne’e bele hasae liu tan ita-nia imunidade  hodi hasoru moras COVID-19 iha ita-nia rain,” Diretora Agostinha hateten.

Nia informa, vasina datoluk ne’e kontinua loke iha sentru saúde sira.  Se mak hakarak hakbesik ba fasilidade saúde ne’ebé mak besik hodi simu  vasina Booster Pfizer.

“Ba labarik sira idade 12 too menus 18 ne’ebé durante ne’e simu ona doze dahuluk, no agora ekipa saúde  komesa ba tuir iha kada eskola estudante sira bele simu tan doze daruak. Ami nia kordenasaun ho parte edukasaun lao ho diak liu-liu professor no diretór sira ne’ebé sai tarjetu ba kada postu administrativu sira,” Nia afirma.

Nune’e nia dehan, eskola balun hahú exame antes  tama  Paskua. Maibé eskola publiku no privadu balun hahu ona exame horseik. Ho ida ne’e hein katak  semana oin sira sei feriadu. Maibé, ekipa saúde kordena nafatin ho eskola sira bainhira exame remata ona  bele aselera vasina doze daruak.

Enkuantu populasaun elijível tinan 18 ba leten, ne’ebe simu ona vasina to’o iha loron 25 abril 2022, tuir sistema informasaun Saúde iha Ministériu Saúde, hanesan kumulativu 1ª doze iha Dili iha 86,6% no kumulativu 2ª doze iha Dili hamutuk 81,5%.

Enkuantu, Sidadaun iha territóriu nasionál ne’ebé simu ona vasina doze dahuluk iha Timor-Leste 84,6% no simu ona doze daruak, 72,1%.

Nune’e, hahú 21 marsu 2020 to’o 25 abril 2022 iha kumulativu kazu konfirmadu 22.860 no óbitu 130.

Jornalista : Felicidade Ximenes

Editóra   : Armandina Moniz

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here