Imajen/Media PR.

DILI, 26 abríl 2022 (TATOLI)—Parlamentu Nasionál liuhosi diskusaun reuniaun plenária aprova projetu-lei númeru 35/V (4ª)-Lei Rádiu Difuzaun iha faze jeneralidade ho votu a-favór 40, kontra 0 no abstensaun 0.

“Nune’e, projeitu númeru 35/V (4ª)-Lei Rádiu Difuzaun aprovadu iha faze jeneralidade hodi kontinua ba diskusaun espesialidade,” Prezidente Parlamentu Nasionál, Aniceto Longuinhos Guterres Lopes, deklara iha plenária, tersa ne’e.

Ho aprovasaun ne’e Komisaun A ne’ebé asuntu Justisa no Konstituisional sei kontinua halo diskusaun kle’an iha faze espesialidade kona-ba matéria kada artigu, hafoin halo relatóriu paresér aprezenta ba meza hodi kontinua lori ba iha plenária atu diskute.

Preámbulu lei Rádiu Difuzaun hanesan ordenamentu jurídiku Timor-Leste (TL) regula jestaun espectro rádiu difuzaun utiliza rádiu difuzaun iha TL.

Komunikasaun sosiál reprezenta meiu transmite informasaun kona-ba kultura, ideia, identidade no sira seluk, nune’e regulasaun ne’e fundamentál ho forma transmite informasaun ho kualidade hanesan direitu fundamentál sidadaun mediátiku livre, plurál, independente no diversu.

Regulamentasaun matéria iha projetu-lei ne’e reune regra ba programasaun obrigatóriu meiu komunikasaun sosiál, oráriu emisaun programa no klarifikasaun funsaun Konsellu Imprensa iha ambitu funsaun fiskalizadór relativamente konteúdu ne’ebé emite ka prodús hosi órgaun komunikasaun sosiál.

Objetu lei regula exersísiu atividade komunikasaun sosiál radiofónika no televiziva iha territóriu nasionál.

Antes ne’e, Prezidente Komisaun A, esplika daudaun ne’e TL iha rádiu 20-resin no televizaun haat ka lima, nune’e hamosu lei ne’e ho nia konseitu ka substánsia mak atu evita servisu órgaun komunikasaun sosiál sira-ne’ebé seidauk rejistu maibé hala’o karik presiza regula, no garante órgaun komunikasaun informasaun bele iha kualidade, garante informasaun ne’ebé fó sai iha balansu ba parte hotu ne’ebé rona no fó informasaun.

“Ne’ebé sei regula liu buat lubuk ida kona-ba regula direitu ba antena, programasaun saida mak informa, nune’e buat lubuk ida mak sei haree rádiu ho televizaun iha kategória públiku no privadu hodi regula direitu no dever,” nia hateten.

Nune’e mós iha lukrutivu no la’os komersiál ne’ebé ita hamosu termu ida kona-ba rádiu dutrinál la’ós lukrutivu hanesan harii hosi igreja, partidu nian, rádiu universidade ne’ebé existe la buka osan só fó informasaun kona-ba povu nia moris no edukasaun sívika.

Maibé daudaun ne’e, rádiu dutrinal existe seidauk barak no antesipa tempu oin mai mosu barak mak sei hamosu konfuzaun entaun prevee lei refere hodi regula.

Tanba ne’e, nia dehan, lei ne’e mai ho objetivu ida de’it garante estabilidade Estadu liuhosi informasaun ne’ebe iha kualidade.

Deputadu Joaquim hateten, durante ne’e órgaun komunikasaun sosiál la’o hela no lei foun ne’e atu regula di’ak liután, nune’e prepara kondisaun balun bainhira mosu tan ka harii ho mós seidauk hetan direitu injustisa, direitu antena hodi regula sira bele hetan sira-nia direitu antena.

“Ne’ebé iha lei ne’e sei rekomenda buat lubuk ida hodi define lei refere, kestaun prinsipál ka fundamentál no kestaun tékniku operasionál sei haruka ba Governu mak regula,” nia dehan.

Enkuantu iha projeitu-lei ne’e iha artigu hamutuk 51, ne’ebé hosi Kapítulu I ko’alia kona-ba Dispozisaun Jerál ho nia artigu hamutuk haat, Kapítulu II Asesu Atividade ho nia artigu ida, Kapítulu III Programasaun ho nia artigu 13, Kapítulu IV  Direitu Antena ho nia artigu rua.

Kapítulu V Atividade Rádiu Difuzaun, Sesaun I Rádiu Difuzaun Públika ho artigu tolu, Sesaun II Rádiu Difuzaun Privadu ho nia artigu tolu, Sesaun III Rádiu Difuzaun Relijioza ho nia artigu lima, Sesaun IV Rádiu Difuzaun Komunitária ho nia artigu haat, Sesaun V Rádiu Difuzaun Assosiativa ho nia artigu haat.

Kapítulu V Entidade Supervizora Komunikasaun Sosiál ho nia artigu rua, Kapítulu VI Rejime Sansionatóriu ho nia artigu ida, Kapítulu VII Kontra Ordenasaun ho nia artigu haat, Kapítulu VIII Sansaun Asesoriais ho nia artigu haat no Títulu III Dispozisaun finál ho artigu ida.

Projetu-lei ne’e asina hosi proponente Deputadu David Dias Ximenes Mandati, António Verdiál de Sousa, Adriano do Nacimento, Joaquim dos Santos, Francisco de Vasconcelos, Antoninho Bianco, Duarte Nunes, Virginia Ana Belo ho Aderito Hugo da Costa.

Notísia Relevante: Komisaun A submete relatóriu paresér projetu-lei Rádiu Difuzaun ba meza PPN

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here