Kapitaun selesaun nasionaál Filomeno Junior da Costa. Imajem espesiál

MALAZIA, 25 abríl 2022 (TATOLI) – Kapitaun selesaun nasionál Timor-Leste U-23, Filomeno Junior da Costa, hamutuk ho nia amigo jogadór sira agradese ba Federasaun Futeból Timor – Leste ne’ebé fasilita ona sira hodi hala´o treinamentu iha Malazia hodi prepara ba kompetisaun Sea Games ne’ebé sei realiza iha Vietname iha fulan-maiu ne’e.

“Ami nia treinu iha ne’e lao di’ak tebes, ami sente preparasaun ne´e bele dehan sufisiente, agradese ba FFTL bele fasilita ona ami hamutuk ho ami nia treinadór mai treinu iha ne’e, halo mós jogu amigável ne’ebé sei akontese iha 29 abríl hasoru selesaun nasional U-23 Malazia nian”, dehan Kapitaun ne’e ba Agência TATOLI iha kampu PKNS Malazia, segunda ne’e.

Nia dehan, ho preparasaun tempu naruk hanesan ne’e bele fó oportunidade ba sira atu hatudu jogu ne’ebé di’ak iha Sea Games agora.

“Iha Sea Games agora ami sei hatudu buat ruma, ami husu timoroan hotu hato´o orasaun mai ami atu ami bele hatudu jogu ne’ebé di’ak hodi hamorin rai doben Timor-Leste”, refere.

Treinamentu ba loron da-tolu hala´o iha kampu PKNS Malazia hahú hosi tuku 17:00-18:30 oras Malazia nian.

“Treinamentu ohin ne’e ami simu tékniku hodi halo kontra no atake ba malu oinsa atu hasoru adversáriu labele lakon bola no ami bele domina bola”, afirma.

Selesaun nasionál U-23 ne’e lidera hosi treinadór Brazileiro Fabio Maciel da Silva ho nia asistente João Paulo no ekipa tomak.

Ekipa selesaun nasionál U-23 sei aranka ba Vietname iha loron 02 maiu hodi partisipa iha jogu SEA Games.

Tuir oráriu SEA Games, iha jogu futeból Timor-Leste sei kontra Filipina, Vietnam, Myanmar no Indonézia.

Durante multi eventu ne’e, sei iha kompetisaun hamutuk 526 hosi desportu hamutuk 40, ne’ebé antes ne’e Komisaun Organizadora hosi Komité Olímpiku Vietname halo ona evaluasaun no bazea mós hosi regra  Southeast Asian Games Federation (SEAGF).

SEA Games ba dala-31 ne’e, ba dahuluk sei aprezenta jogu Xiangqi ka xadres hosi Xina.

Eventu ne’e sei partisipa hosi ema maizumenus 10.000, kompostu hosi atleta, ofisiál, delegasaun no mídia ne’ebé sei halo kobertura.

SEA Games tinan 2021, tuir loloos realiza iha 21 novembru to’o 02 dezembru 2021, maibé ikus mai adia ba maiu 2022.

Asembleia Nasionál Vietname iha fulan kotuk aprova ona millaun $33 hodi organiza eventu multidesportivu ne’ebé partisipa hosi nasaun 11 hanesan Brunei Darusalam, Cambódia, Indonézia, Malázia, Myanmar, Laos, Singapura, Filipina, Timor-Leste, Tailándia no Vietname.

Jogu ne’ebé sei aprezenta iha eventu ne’e regula hosi Federasaun Jogu Sudeste Aziátiku ho supervizaun hosi Komité Olímpiku Internasionál (IOC, sigla inglés) no Konsellu Olímpiku Ázia (OCA, sigla inglés).

Jornalista: Hortencio Sanchez

Editór : Zezito Silva

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here