iklan

HEADLINE, IMAJEN, MUNISÍPIU, OÉ-CUSSE (RAEOA), SAÚDE

Parteira Armandina hakotu iis iha Hospital Referál Oé-Cusse

Parteira Armandina hakotu iis iha Hospital Referál Oé-Cusse

Matebian parteira Armandina de Fátima hakotu iis iha Hospitál Referál Oé-Cusse. Imajen espesiál.

OÉ-CUSSE, 26 abríl 2022 (TATOLI) – Parteira Armandina de Fátima nu’udar profisionál saúde iha Rejiaun Administrativa Espesiál Oé-Cusse Ambeno (RAEOA), hakotu iis iha Hospitál Referál Oé-Cusse (HRO) tanba sofre moras ipertensaun.

Família matebian Blasco Nese, hatete, matebian durante ne’e moras kleur ona ho tensaun, maibé bainhira to’o ospitál atu deteta nia saúde maibé rezultadu di’ak hela, laiha ameasa ruma ba nia saúde tomak.

“Ami-nia alin ne’e nia moras tensaun ne’e akontese dala barak ona, dalaruma akontese iha enkontru hetan atakasaun derrepente, dalaruma akontese iha merkadu hetan atakasaun, lakon hanoin bele monu rasik, kleur mak mai foin sadar oituan, nia moras mak ida -e’e, foin daudaun akontese kalan rua de’it to’o ospitál mak hakotus iis,” Blasco Nese, ko’alia bairru Horta, Oé-Cusse, tersa ne’e.

Nu’udar família matebian, husu perdaun ba Estadu Timor-Leste liuliu Ministériu Sáude (MS) ne’ebé durante ne’e matebian hala’o kna’ar nu’udar parteira iha Hospitál Oé-Cusse, hatudu komportamentu ladún di’ak, parte família husu deskulpa.

Diretora Apoia Hospitál Referál Oé-Cusse, Catarina Anunu, sente triste tanba lakon profisionál saúde feto ida iha Hospitál Referál Oé-Cusse.

“Durante matebian hala’o kna’ar iha ospitál, nia karakter, ema hamnasadór, no ko’alia la barak maibé kuidadozu hala’o nia kna’ar, maibé tanba planu Maromak nian, kolega ne’e hakotu iis iha Hospitál iha loron-domingu, 24 abríl 2022, tuku 23:14 kalan, maske esforsu tomak halo tratamentu maibé Maromak hadomi liu nia hodi bolu hikas nia ba Maromak nia kadunan santu,” nia katak.

Biografia

Matebian Armandina de Fátima, moris iha Mota Ulun, Bazartete, munisípiu Likisa, iha 08 marsu 1973, nu’udar oan ba dahuluk hosi maun alin na’in-lima (5), feto tolu (3) no mane rua (2), mai hosi aman Jaime Mario dos Santos no Isabel Alves.

Nivél Edukasaun

Iha tinan 1991 bainhira akontese Masakre Santa Krus, matebian Armandina de Fátima, hahú nia estudu iha pré-eskolár Likisá to’o remata, no iha tinan 1994 matebian kontinua nia estudu iha eskola pre-sekundária Likisá.

Nune’e bainhira remata, matebian kontinua nia estudu iha eskola enfermajen iha kapitál Díli iha tinan 1996 no iha tinan 1997 matebian kontinua tán nia estudu iha eskola diploma parteira I iha kapitál Díli.

Esperiénsia serbisu

Iha tinan 1998 matebian Armandina de Fátima, hahú servisu dahuluk iha fasilidade saúde, nu’udar kontratadu ba parteira komunitária destaka iha RAEOA iha sentru saúde Nibin, suku Usitaqueno, sub-rejiaun Oésilo.

Nune’e to’o faze ukun-an, iha 2003 matebian hetan fiar hosi Estadu Timor-Leste hodi sai nu’udar funsionáriu permanente iha Ministériu Saúde (MS) no hetan kedas kolokasaun iha Hospitál Referál Oé-Cusse.

Iha 2004 matebian tuir formasaun kona-ba partu-mos no seguru durante tinan ida, no iha 2005 matebian kontinua tuir formasaun kona-ba emerjénsia obsterik care durante tinan ida, no iha 2020 matebian tuir formasaun kona-ba simulasaun hodi atende inan sira ho kazu emerjénsia nian durante tinan ida.

Jornalista   : Abílio Elo Nini
Editór         : Evaristo Soares Martins

iklan
iklan

Leave a Reply

iklan
error: Content is protected !!