Motorista Mikrolete diresaun 01 to'o 012, tersa ne'e, deside halo asaun greve hasoru Governu hodi la halo movimentu hodi tula pasajeiru sira. Imajen/Espesiál.

DILI, 26 abril 2022 (TATOLI)—Motorista Mikrolete diresaun 01 to’o 012, tersa ne’e, deside halo asaun greve hasoru Governu hodi la halo movimentu buka no tula pasajeiru hanesan baibain, tanba pasajeiru sira selu la tuir folin mina ne’ebé sa’e.

“Objetivu ami-nia asaun greve ida ne’e ami hala’o ba asuntu rua. Asuntu ida kona-ba tarifa pasajeiru atu selu no asuntu seluk kona-ba subsídiu seletivu ne’ebé fó sai hosi Prezidente Tane Konsumidores, ne’ebé ko’alia kona-bá subsídiu konvustvel ba iha Transporte Públiku liu-liu mikrolete no taxi,” Portavós Motorista Mikrolete 01 to’o 012, Egas Ximenes da Costa, hateten ba jornalista sira, iha Merkadu Lama, Dili, tersa ne’e.

Kestaun mina nia folin sa’e, nia dehan, motorista sira laiha kompeténsia atu hatún mina-nia folin maibé sira husu ba Governu liu-liu Ministériu Transporte no Komunikasaun (MTK) atu hadi’a no haree liu kona-ba tarifa atu pasajeiru sira bele selu tuir.

“Mina folin sa’e, ami motorista laiha kompeténsia atu hatun mina nia folin, tanba presu ne’ebé sa’e mai hosi merkadu internasionál to’o mai iha nasionál. Maibé ami-nia ezijénsia ba Ministériu Transporte no Komunikasaun no Dirasaun hotu atu bele hadi’a nia tarifa. Tanba, ami fó sai ona iha fulan ida kotuk kona-ba tarifa ba pasajeiru hanesan estudante ne’e selu sentavus 20, maibé ba pasajeiru baibain ne’e ami mantein nafatin tuir lei ne’ebé vigór ona, katak pasajeiru baibain ne’e centavus 25,” nia dehan.

Ho asuntu ne’e, Motorista Mikrolete sira husu ba Ministériu Transporte no Komunikasaun (MTK) atu aprezenta ba Parlamentu Nasionál (PN), hodi hamosu rezolusaun ruma, nune’e bele responde ba situasaun agora.

Tanba ne’e, ho asaun greve ne’ebé motorista sira halo durante loron tolu laiha solusaun mak sira sei halo asaun seluk hanesan sei halo konferénsia imprensa no hato’o mós sira-nia rekomendasaun ba Ministériu Transporte Telekomunikasaun Sosiál (MTTK) atu responde ba ezijénsia ne’e.

“Ho mina folin sa’e hahú hosi janeiru to’o agora ne’e, halo ami-nia rendimentu tun hanesan loron ida ami hetan de’it $45,” nia informa.

Estudante Fakuldade Medisina Siénsia Saúde, Departamentu Parteira iha Universidade Nasionál Timor-Lorosa’e (UNTL), Ledi Diana Pinto Magno, la satisfas ho tarifa ba transporte públiku mikrolete ne’ebé selu ho sentavus 20 ne’e.

“Ami ladun satisfas ho tarifa transporte públiku hanesan mikrolete ne’ebé agora dehan selu sentavus 20, tanba ami hanesan estudante ami mós presiza buat barak, alende ne’e osan ba ami mós araska, tanba dook hosi inan-aman sira. Tanba ne’e, ami husu ba Governu atu halo mikrolete halo fali movimentu no selu normál ho sentavus 15, atu nune’e ami bele hala’o estudu ho di’ak,” nia hateten.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here