Komunidade suku Ban-Afi iha RAEOA voluntariumente hadi'a rasik sira-nia estrada hodi lori produtu ba merkadu no asesu ba fasilidade saúde. Imajen espesiál.

OÉ-CUSSE, 26 abríl 2022 (TATOLI) – Komunidade uma kain rihun rua, iha suku Ban-Afi, sub-rejiaun Nítibe, Rejiaun Administrativa Espesiál Oé-Cusse Ambeno (RAEOA), voluntária hadi’a rasik sira-nia estrada hodi fasilita komunidade lori produtu ba merkadu, asesu ba klínika no fasilita oan-sira ba eskola.

Xefe suku Ban-Afi, José Tefa, hatete, komunidade iha suku Ban-Afi hamutuk aldeia Tolu, Kuanobe, Neofmetan no aldeia Hautefo hahú serbisu voluntáriu hadi’a rasik estrada, durante loron rua ona, hahú segunda 25 to’o tersa 26 abríl semana ne’e.

“Komunidade aldeia tolu serbisu voluntáriu iha ami-nia suku loron rua ona. Ida-ne’e ami sei kontinua nafatin, tanba intensaun ne’e atu asesu ba klínika, merkadu no fasilita oan-sira ba eskola iha Noetoko tanba distánsia dook no hakat mota mak foin to’o,” xefe suku Ban-Afi, José Tefa, hateten iha Oé-Cusse, tersa ne’e

Suku Ban-Afi hatama proposta iha autoridade RAEOA, maibé laiha resposta, tan ne’e maka xefe suku rasik aviza ba komunidade kada aldeia atu halo serbisu ba bairru laran ho voluntariumente.

“Komunidade iha aldeia Kuanobe, sira hadi’a estrada asesu ba merkadu Pune, suku Usitasa’e sub-rejiaun Oésilo nian tanba merkadu ne’e realiza kada loron kinta semana ida, maioria komunidade lori produtu ba fa’an iha-ne’ebá, no hadi’a mós hodi merkadu tún to’o eskola Ensinu Báziku Sentrál (EBC, sigla portugés) Noetoko, suku Ban-Afi, atu fasilita oan sira ba eskola,” nia katak.

Nune’e mós komunidade sira iha aldeia Neofmetan, hadi’a estrada hosi bairru Besatoko liga ba aldeia Hautefo, bairru Nefomtasa atu asesu ba sede suku, no iha aldeia Hautefo, bairru Nefomtasa hadi’a estrada liga sedeba suku no kontinua ba bairru Lil’as, suku Usitasae no bairru laran atu asesu ba igreja, klínika no ba merkadu Pune.

“Fatin sira ha’u temi ne’e, kondisaun estrada grave tebes, tanba hetan estragu iha tempu udan, agora udan-been menus ona, ami tenke hadi’a rasik tanba estrada maioria iha sub-rejiaun Nítibe desde uluk to’o agora seidauk tau alkatrasaun no ponte, ne’ebé bainhira udan ami-nia estrada nakonu ho tahu,” nia fó-sai.

Iha fatin seluk, xefe aldeia Kuanobe, suku Ban-Afi, Jorge Lalus, hatete, aldeia Kuanobe viziñu kedas ho merkadu Pune, maibé iha tempu udan susar tebes atu asesu ba merkadu.

“Am-nia aldeia ne’e, desde uluk kuandu tempu udan rai tahu nakonu karreta no motorizada labele liu, agora udan-been menus ona, entaun ami hamutuk ho komunidade inisiativa rasik hadi’a, tanba asesu ba merkadu Pune iha suku Usitasa’e, sub-rejiaun Oésilo ladún di’ak,” xefe aldeia Kuanobe hateten.

Bazea dokumentu 2021 tuir dadus cesta bázika hatudu, iha suku Ban-Afi totál populasaun hamutuk 2.415 komposta hosi mane 1.215 no feto 1.200 mai hosi aldeia Kuanobe 1.103, aldeia Hautefo 925 no aldeia Neofmetan 387.

Nune’e mós bazea dokument sensus populasaun 2015, iha suku Banafi totál populasuan hamutuk 1.762 kompostu hosi mane 840 no feto 922, ho totál uma-kain hamutuk 419, ho totál área suku Ban-Afi hamutuk kilómetru 817.23.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here