Imajen Hortencio

MALAZIA, 26 abríl 2022 (TATOLI) – Jogadór João Soares ho pozisaun defesa hosi selesaun nasionál Timor-Leste U-23 la konsege partisipa jogu iha Sea Games tanba ho kondisaun aleiza ne´ebé seidauk rekuperadu.

“Jogadór sira nia kondisaun maioria 95% prontu atu bele joga iha eventu sira ne’e, só na’in ida de’it João Soares (Ajompe) mak la prontu atu joga tanba nia ain sei aleiza hela”, refere Médiku Jerál Servisu Ospitál Nasionál Guidu Valadares, Departamentu Banku Urjénsia, Eldegar Lopes Martins ba Agência TATOLI iha Malazia, tersa ne’e.

Nia dehan, kondisaun jogadór Ajompe ho númeru kamizola 29 nia kondisaun bele demora to´o fulan, maske nune´e, jogadór Gumario Morreira mak sei substitui nia iha defeza.

“Nia kondisaun ne’e sei presiza halo tratamentu, nia ain ne’e aleiza bainhira ita joga iha AFF fulan hira ba kotuk iha Kamboja, bainhira ba halo tratamentu iha ne’ebá kondisaun di’ak hela maibé fila fali ba Timor-Leste liu fulan ida nune’e nia ba tuir terapi iha ospitál, di’ak oituan maibé sira treinu fila fali mak halo ain ne’e kanek fali iha laran entaun nia tenke deskansa to´o di’ak mak nia joga fali, maibé seluk ne’e iha kondisaun atu joga, sira nia kondisaun fíziku mentál di’ak hot”, afirma

Jogadór Ajompe hanesan defeza importante ba selesaun nasionál U-23 maibé kondisaun saúde la di’ak jogadór ne’e obrigadu labele tuir jogu maibé nafatin akompaña nia amigu sira iha lista selesaun nian.

Dadauk ne’e jogadór selesaun nasionál U-23 hamutuk na’in 22 ne’ebé mak hela iha Malazia hodi halo treinamentu másimu liutan.

Ekipa selesaun nasionál U-23 sei aranka ba Vietname iha loron 02 maiu hodi partisipa iha jogu Sea Games.

Tuir oráriu Sea Games, iha jogu futeból Timor-Leste sei kontra Filipina, Vietnam, Myanmar no Indonézia.

Durante multi eventu ne’e, sei iha kompetisaun hamutuk 526 hosi desportu hamutuk 40, ne’ebé antes ne’e Komisaun Organizadora hosi Komité Olímpiku Vietname halo ona avaliasaun no bazea hosi regra  Southeast Asian Games Federation (SEAGF).

Sea Games ba dala-31 ne’e, ba dahuluk sei aprezenta jogu Xiangqi ka xadres hosi Xina.

Eventu ne’e sei partisipa hosi ema maizumenus 10.000, kompostu hosi atleta, ofisiál, delegasaun no mídia ne’ebé sei halo kobertura.

Sea Games tinan 2021, tuir loloos realiza iha 21 novembru to’o 02 dezembru 2021, maibé ikus mai adia ba maiu 2022.

Asembleia Nasionál Vietname iha fulan kotuk aprova ona millaun $33 hodi organiza eventu multi desportivu ne’ebé partisipa hosi nasaun 11 hanesan Brunei Darusalam, Cambódia, Indonézia, Malázia, Myanmar, Laos, Singapura, Filipina, Timor-Leste, Tailándia no Vietname.

Jogu ne’ebé sei aprezenta iha eventu ne’e regula hosi Federasaun Jogu Sudeste Aziátiku ho supervizaun hosi Komité Olímpiku Internasionál (IOC, sigla inglés) no Konsellu Olímpiku Ázia (OCA, sigla inglés).

Jornalista: Hortencio Sanchez

Editór : Zezito Silva

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here