Estudante iha EBC Ladi tuir ezame trimestre dahuluk. Imajen Tatoli/Celestina Teles.

COVALIMA, 26 abril 2022 (TATOLI)—Diretór Eskola Bázika Sentrál (EBC, sigla portugés) Ladi, Pedro Amarál informa, iha segunda ne’e, estudante EBC Ladi hamutuk 921 partisipa ezame trimestre dahuluk iha tinan letivu 2022.

“Estudante EBC Ladi hamutuk 921 mak partisipa ezame trimestre dahuluk. Hosi númeru ne’e mane 460 no feto 461, ho profesór 42 ne’ebé kompostu hosi mane 29 no feto 13,” Pedro Amaral hateten ba Agência Tatoli, tersa ne’e.

Maske nune’e, diretór ne’e hateten bazea ba kalendáriu hosi Ministériu Edukasaun Juventude no Despotu estudante hala’o ezame trimestre dahuluk iha loron 18 fulan-abríl maibé estudante sira hala’o fali ezame iha loron 25 fulan-abril ne’e no sei ramata iha loron 30 abríl, tanba monu kedas iha eleisaun prezidensiál ne’ebé realiza iha 19 abríl 2022.

Tuir loloos, hafoin finaliza ezame trimestre dahuluk sei iha prosesu prenxe kaderneta no estudante sira sei feriadu semana ida, maibé ida-ne’e impede hosi eleisaun prezidesiál segunda volta.

“Ami adi’a, nune’e semana oin sei halo korresaun no prenxe kaderneta ba estudante sira, nune’e laiha orientasuan atu feriadu ida-ne’e hanesan mekanizmu hosi diretór hodi halo jestaun ba tempu, nune’e iha loron 09 fulan-maiu ne’e, ami inisia prosesu aprendizajen ba ezame trimestre daruak. Tuir loloos iha loron 01-06 fulan-maiu, ami feriadu,” nia dehan.

Diretór Servisu Edukasaun Covalima Rui Suni Seran, rekuñese estudante hala’o ezame trimestre dahuluk la tuir kalendáriu hosi Ministériu Edukasuan Juventude no Desportu tanba realiza eleisaun prezidensiál segunda volta

“Ita adia hala’o ezame trimestre dahuluk ba estudante sira-ne’ebé fó sai liuhosi sirkulár Ministériu Edukasaun Juventude no Desportu (MEJD), tanba realiza eleisaun prezidensiál ba segunda volta,” nia klarifika.

Tuir dadus hosi Servisu Edukasaun Covalima, eskola iha Covalima mak hanesan, eskola bázika Central 23 kompostu hosi eskola públiku 20, eskola Katólika tolu (3) ho nia filiál 85, Ensinu Sekundáriu Jerál haat (4) no Eskola Tékniku Vokasionál lima.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here