Diretór Servisu Edukasaun Munisípiu Viqueque, Emídio Amaral. Imajen Tatoli/Vitorino Lopes da Costa.

VIQUEQUE, 26 abril 2022 (TATOLI)–Diretór Servisu Edukasaun munisípiu Viqueque, Emídio Amaral, informa, eskola Ensinu Báziku to’o Sekundariu iha Viqueque, segunda ne’e, hahú fó ona ezame primeiru períodu ba estudante sira.

“Prosesu ezame ba estudante sira la’o ho di’ak no sei remata iha sábadu,” Diretór hateten ba Agência Tatoli, iha ninia knaar fatin, tersa ne’e.

Aleinde ne’e, edukasaun munisípiu Viqueque distribui ona kaderneta ba eskola sira hodi priense estudante sira-nia valór ezame.

“Maibé kaderneta ne’ebé ami fahe ne’e to’o exame segundu períodu de’it, eskola balun mós seidauk hetan kaderneta. Kaderneta ne’ebé ami distribui ba eskola sira hamutuk 13.000,” nia hato’o.

Notísia relevante: MEJD deside adia ezame primeiru períodu ba estudante sira

Iha fatin ketak, Diretór Eskola Sekundáriu Calixa Viqueque Vila, Rozito Soares do Rosário, haktuir, ezame la’o daudaun, tuir lolos ezame primeiru períodu hala’o iha loron 18 abril, maibé iha mudansa ba kalendáriu ezame primeiru períodu hosi Ministériu Edukasaun Juventude no Desportu (MEJD) ba loron 25 abril ne’e.  

“Atu fasilita ezame primeiru períodu ne’e, ami husu kontribuisaun osan hosi estudante sira tanba Ministériu Edukasaun Juventude no Desportu seidauk haruka mai,” nia akresenta.

Eskola Sekundáriu Calixa seidauk hetan kaderneta ba anu letivu 2022, nune’e profesór sira sei prienxe.

“Estudante hosi klase 2 no klase 3 kaderneta prontu ona maibé klase 1 maka seidauk iha,” nia tenik.

Estudante Eskola Sekundáriu Calixa Viqueque ne’ebé partisipa ezame primeiru períodu hamutuk 475, kompostu hosi siénsia tenolojia no siénsia sosiál.

Jornalista : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here