Vise-Prezidente CNE, Domingos Barreto. Imajen Tatoli/Sérgio da Cruz.

DILI, 26 abríl 2022 (TATOLI)—Vise-Prezidnente Komisaun Nasionál Eleisaun (CNE-sigla portugés), Domingos Barreto, hateten CNE sei taka sai rezultadu apuramentu nasionál iha kuarta (27/04) aban.   

“Ohin, ami halo reuniaun ba kandidatu Prezidente Repúblika na’in-rua nian no sei taka sai iha aban tuku 14h00,” Domingos Barreto hateten ba Agência TATOLI, via telefónika, tersa ne’e.

Hosi ne’e, CNE sei fó oras 24 ba kandidatu Prezidente Repúblika períodu 2022-2027 na’in-rua, José Ramos Horta no Francisco Guterres Lú Olo, hodi halo rekursu maibé karik laiha rekursu mak CNE sei submete ba Tribunál Rekursu (TR).

“Ami taka sai rezultadu iha tuku rua lorokraik, depois fó oras 24 ba kandidatu atu halo rekursu, karik laiha entaun ami haruka ona ba Tribunál Rekursu hodi haree no valida,” nia dehan.

Iha rezultadu apuramentu provizóriu hosi sentru votasaun 1.200, totál eleitór 859.925, ema ne’ebé tuir vota 646.389, votu válidu 640.967 (99,16%), branku 1.643 (0,25%), nulu 3.734 (0,58%), rejeitadu 28 (0,00%), abandonadu 15, ne’ebé hosi rezultadu ne’e José Ramos Horta ho votu 398 028 (62,1%) no Francisco Guterres ‘Lú Olo’ ho votu 242.939 (37,9%).

Hafoin konklui apuramentu nasionál, Prezidente CNE, José Agustinho da Costa Belo, informa durante prosesu apuramentu, ofisiál ne’e sira identifika votu branku, nulu, rejeitadu no abandonadu hamutuk 5.048, ne’ebé hafoin verifika ikus mai deside votu 1.200 sai válidu, nune’e kandidatu númeru  sorteiu 01 hetan aumentu votu 800 no kandidatu númeru sorteiu 02 hetan 400.

“Hosi votu ne’ebé iha, kandidatu ho númeru sorteiu 01, José Ramos Horta antes ne’e ho votu 397.145 aumenta ba votu sai 398.082, nune’e mós ho kandidatu ho númeru sorteiu 02, Francisco Guterres ‘Lú Olo’ ne’ebé antes ne’e ho votus 242.440 amenta votu sai 242.939,” Prezidente CNE, relata ba jornalista hafoin enserra prosesu apuramentu nasionál iha salaun CNE, Colmera, sábadu (24/04).

Notísia Relevante: CNE konklui apuramentu nasionál no deside votu 1.200 sai válidu

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here