Segundu Komandante Jerál PNTL, Mateus Fernandes no Prezidente Institutu Acacio Cardoso, asina notaentendimentu iha area formasaun pedagozia ne'ebé sei oferese hosi CFP ba dosente IPB sira.Imajen/Tatoli, Natalino da Costa.

DILI, 26 abríl 2022 (TATOLI)-Sentru Formasaun Polisia Comoro (CFP,sigla portugés), tersa ne’e, asina nota intendimentu (Memorandum Of Understanding) ho Institutu Politékniku Betano (IPB) durante tinan lima 2022 to’o 2027 iha área formasaun pedagozia.

Segundu Komandante PNTL, Komisáriu Mateus Fernandes, hateten akordu ne’e ho objetivu atu oferese formadór husi Sentru Formasaun Polisia nian ba hanorin IPB iha área pedagozia.

Nune’e, husi parte IPB sei fó mós oportunidade ba membru Polisia Nasionál Timor-Leste atu kontinua sira-nia estudu iha Institutu Politékniku Betano hodi aumenta kapasidade intelektuál ba dezenvolve instituisaun PNTL.

“PNTL halo ona (MoU-red) ho Universidade Nasionál Timor-Leste (UNTL) , Universidade da Pás (UNPAZ) no ohin ita halo ho IPB, nune’e parte rua bele aprende hamutuk hodi kompleta malu,” Komisáriu Mateus Fernandes, hateten iha ninia intervensaun ohin, iha CFP Comoro.

Iha fatin hanesan Komandante CFP,  Arquimino Ramos, reforsa korpu dosente sira hosi IPB iha interese atu partisipa kursu pedagozia nivel sertifikadu IV maibé kuríkulu formasaun ne’ebé uza hodi hanorin ne’e kuríkulu dosente nivél V.

“Ami sei halo deskusaun filafali ho parte IPB kona-ba data serteza ba formasaun ne’e, parte dosente IPB maka mai ga ami-nia instrutór sira maka bá iha Betano,”  Arquimino Ramos hateten.

Ikus liu Prezidente IPB Acacio Cardoso Amaral, hateten IPB iha dosente hamutuk ema na’in 30-resin maka sei partisipa formasaun pedagozia ne’ebé sei oferese husi CFP.

“IPB mós sei oferese formasaun ba membru PNTL sira iha área rua hanesan konstrusaun sivil no produsaun animal,”nia dehan.

Jornalista : Natalino Costa

Editór        : Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here