DILI, 25 abríl 2022 (TATOLI)-Prosesu instalasaun kaixote lixu hamutuk rihun 4 iha Dili seidauk la’o tanba sei hein rezultadu audotória husi Tribunál Kontas ne’ebé halo auditoria ba dokumentu empreza implementadór ne’ebé maka sei implementa projetu ne’e.
Prezidente Autoridade Munisípiu Dili, Guilhermina Filomena Saldanha Ribeiro, hateten nia parte hamutuk ho kompañia sei hahú ezekuta projetu ne’e bainhira simu ona rezultadu auditoria husi Tribunál Kontas.
Notísia Relevantes :Prosesu instalasaun kaixote lixu 4.000 tama ona auditoriu Tribunál Kontas
“Ami hein hela Tribunál Kontas aprova atu depois Ministru asina kontratu ita bele hala’o ona, tanba ida ne’e kompañia mak sei hala’o en kordenasaun ho Autoridade Munisípiu Dili,” nia dehan ba jornalista sira iha Matadouru Dili, segunda ne’e.
Empreza China Harbour ne’ebé maka halo konsorsiu ho PAX no Senai Timor-Leste maka sei instala projetu kaixote lixu rihun 4 ne’e iha zona 40 iha Dili kompostu husi parte Leste 18 no Oeste 22 ho orsamentu hamutuk Millaun $ 2.3.
Atu implementa projetu ne’e ho di’ak, nia dehan Autoridade Munisípiu Dili nu’udar na’in ba projetu ne’e sei hametin liña koordenasaun ida di’ak ho kompañia implementadór sira nune’e bele ezekuta projetu ho kualidade.
“Tanba sira mai ho sira-nia transporte ida ne’ebé la hanesan ho transporte ne’ebé agora ita halo, entaun ita hein de’it bainhira Tribunál Kontas aprova, Ministru (MAE-red) asina ona kontratu ita hala’o dadauk,” Prezidente Autoridade Dili ne’e hateten.
Entretantu, hahú hosi 2016 bazea ba estudu Banku Dezemvolvimentu Aziátiku (ADB) hatudu iha 2020, Dili prodús lixu 260 tonelada, ne’ebé 45% mak transporta ba iha lixeira Tibar-Liquiça no 55% ho ezemplu 33% sunu de’it, soe liu 7%, hakoi 6%, soe iha drainazen 5% no seluk tán.
Notísia Relevantes :AMD sei koloka kaixote lixu 4000 iha sidade Dili
Jornalista : Nelia Fernandes
Editór : Agapito dos Santos
