DILI, 25 abríl 2022 (TATOLI)—Ministra Saúde, Odete Maria Freitas Belo informa, makina Raiu-X avaria iha Ospitál Eduardu Ximenes Baucau oras ne’e hahú ona iha prosesu kompras ekipamentus no sei funsiona fila fali iha tempu badak.
“Makina Raiu-X avaria iha Ospitál Eduardo Ximenes Baucau durante tinan naruk ona. Ami haree katak makina ne’e presiza kompras ninia ekipamentu balun hanesan batrea no detektor . Ho ida ne’e, prosesu lao ona hein katak bele troka no funsiona fila fali iha tempu badak nia laran,” Ministra Saúde Odete Maria Freitas Belo informa ba jornalista iha INS Comoro, ohin.
Nia dehan asuntu ida ne’e informa ona ba diresaun ne’ebé mak responsabiliza ba iha área ekipamentus mediku atu bele fornese makina foun ne’ebé mak iha atu nune’e bele uza hodi fó atendimentu ba pasiente sira.
Iha fatin hanesan, Diretór Ezekutivu HOREX Baucau, Evangelino Soares informa makina Raiu-X ne’e nia batrea ka detektor mak la funsiona. Maibé agora ne’e iha ona prosesu manutensaun tanba ekipamentu balun at presiza tempu naruk atu hadia.
“Avaria ne’e laos makina mak at maibé makina ne’e diak hela. Maibe, ekipamentus balun mak too ona tempu para atu troka. Prosesu sira ne’e lao ne’e no iha tempu badak sei funsiona ,” Diretór Ezekutivu HOREX Baucau, Evangelino hateten.
Nia informa daudaun ne’e Ospitsál Eduardu Ximenes Baucau uza hela mobile x-ray hodi fasilita pasiente sira halo tratamentu saúde. Ho nune’e, hein katak prosesu sira ne’e iha semana oin tekniku sira bele ona haree batrea no detektór depois sei funsiona fila fali.
“Ita presiza hadia no troka ekipamentu balun entaun ida ne’e iha ona prosesu nia laran. Ha’u espera ita sei hadia ita tempu badak ne’e,” Nia dehan.
Jornalista : Felicidade Ximenes
Editora : Armandina Moniz
