imagen google

DILI, 25 abríl 2022 (TATOLI)—Durante tinan rua nia laran sala operasaun iha Ospitál Referénsia Maubisse la ativa tanba makina anestesia avaria. Maibe, iha semana oin sala operasaun  sei reativa fali.

“Ami problema ho makina anestesia tanba durante  tinan rua nia laran la funsiona. Maibé,  iha sesta semana kotuk ami simu   fali makina foun atu hahú reativa fali iha semana oin hodi  halo atendimentu ba pasiente sira, liu-liu parte operasaun nian,” Diretora Ezekutiva Ospitál Referénsia Maubisse, Grabiella da Conceição  Magno Pereira hateten ba jornalista sira iha  INS, ohin.

Nia hateten, makina refere  instala ona  no  pedidu mos haruka ba iha Servisu Autónomu Medikamentu no Ekipamentu Saúde (SAMES) liu-liu ba parte medikamentus.

“Kona-ba rekursu ami sufisiente. Tanba, espesialista iha  na’in lima hamutuk ho enfermeiru nomos parteira sira. Ami iha ne’e rekursu umanu masimu ona  tanba durante ne’e ami preokupa deit mak ba  makina anestesia. Tanba, dala-barak inan isin rua ne’ebé  atu partus liu husi  sesariana, tenki transfere ba hospital nasionál tanba makina avaria,” Nia informa.

Nia dehan tan, kuandu  makina ne’e funsiona ona, mak inan isin rua husi municípiu Ainaro no  Same, bele direita halo tratamentu liu-liu ba  inan ne’ebé atu partus liu husi sesariana. Ida ne’e bele hamenus kustu ba transporte. Tanba durante ne’e  maioria kazu operasaun   haruka  ba Ospitál Nasionál Guido Valadares (HNGV).

Grabiella mos rekoñese ba transporte ambulánsia laiha problema. Tanba sira iha ambulánsia rua mak apoiu ona servisu iha ospitál  Referénsia  Maubisse.

Jornalista : Felicidade Ximenes

Editóra    : Armandina Moniz

 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here