Funsionáriu SEKoop na’in-25 partisipa formasaun espesializada área integridade, iha salaun NCBA, Railaco, segunda (24/04). Imajen Tatoli/Arminda Fonseca

ERMERA, 25 abril 2022 (TATOLI)–Sekretáriu Estadu Kooperativa (SEKoop), Elizário Ferreira, segunda ne’e, halo abertura formasaun espesializada iha área integridade ba funsionáriu públiku instituisaun ne’e hamutuk na’in-25.

“Formasaun espesializada importante tebes tanba ko’alia kona-ba integridade nu’udar atributu esensiál xave ne’ebé lideransa ida tenke iha. Tanba integridade mak konseitu ida iha relasaun ho konsisténsia valór, métodu, sasukat ba prinsípiu espetasaun no asaun seluk ne’ebé iha rezultadu,” Sekretáriu Estadu hateten iha salaun NCBA, postu administrativu Railaco, munisípiu Ermera.

Notísia relevante: Prezidente KFP fó pose ba Diretora Jerál Finansa SEKoop

Governante ne’e konsidera, integridade hanesan ema ne’ebé onestu no iha karakter forte iha atitude ne’ebé defende prinsípiu laloos.

“Hanesan halo korrupsaun sai baze ne’ebé metin iha valór morál sira, kualidade atitude no kondisaun hatudu iha unidade no ihe poténsia kapasidade hodi hatudu karakter umildade, onestidade no simplisidade,” nia akresenta.

Definisaun integridade katak konsisténsia no firmeza ne’ebé la nakadoko iha defeza ba valór no iha fiar ne’ebé a’as, no definisaun seluk hosi integridade maka konseitu ne’ebé hatudu konsisténsia entre asaun ho valór no prinsípiu sira.

“Matéria termu integridade ne’e hanesan pilár importante tebes iha vida instituisionál, maski nia iha konseitu oioin mak tau iha ne’ebá, maibé iha prinsípiu tolu ne’ebé ita atu uza hanesan serví, hatudu dalan, funsionáriu públiku ka sé de’it mak sai líder asegura integridade ba funsionáriu tomak,” nia hateten.

Nune’e, polítika integridade no transparénsia nia objetivu prinsipál maka estabelese mekanizmu no prosedimentu intermu kona-ba integridade, auditoria no inisiativu ba denunsia irregularidade hanesan medida antí-korrupsaun, aplika efetivamente kódigu konduta, étika, polítika no diretrize sira.

“Ha’u husu ba funsionáriu sira atu aproveita didi’ak oportunidade hodi serví rai ida-ne’e ho di’ak liuhosi karakter umildade no onestidade, nune’e aban bain rua ita boot sira hetan reformasaun karik, ita boot sira sai ema ne’ebé profesionál hanesan sai asesór, tékniku, jurídiku, hodi serví ita-nia rai tanba ita labale moris depedénsia maka’as ba malae,” nia tenik.

Funsionáriu na’in 25 ne’ebé ohin tuir formasaun espesializada hahú hosi kargu xefia no funsionáriu sira, ho durasaun formasaun durasaun loron-lima, hahú loron 25 to’o 29 abril 2022.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here