Vise-Ministru Edukasaun Juventude no Desportu, António Guterres hato’o liafuan badak durante sosializasaun matríkula pre-eskolár, iha salaun Servisu Edukasaun Viqueque, tersa (25/04). Imajen Tataoli/Vitorino Lopes da Costa

VIQUEQUE, 25 abril 2022 (TATOLI)—Ministériu Edukasaun Juventude no Desportu (MEJD) liuhosi Diresaun Nasionál Edukasaun Ensinu Pre-Eskolár, segunda ne’e, halo sosializasaun kona-ba regra matríkula Pre-Eskolár ba profesór iha munisípiu Viqueque.

Tuir Vise-Ministru Edukasaun Juventude no Desportu, António Guterres, ministériu introdús kestaun ne’e tanba hola parte ba planu estratéjiku nasionál tinan 2011 to’o 2030.

“Ita hatene katak Pre-Eskolár nu’udar edukasaun fundamentál bázika tebes no hanesan edukasaun família ne’ebé importante sai mós alternativa atu ajuda ita-nia oan sira iha koñesimentu ba prosesu estudu molok tama Ensinu Báziku,” Vise-Ministru relata ba Agência Tatoli iha salaun Servisu Edukasaun munisípiu Viqueque.

Notísia relevante: MEJD lansa regra matríkula pre-eskolár iha Raifun

Maski nune’e,  MEJD nota katak taxa matríkula Pre-Eskolár kada tinan iha nível nasionál menus no distánsia dook hosi suku bá eskola.

Nune’e, Vise-Ministru husu inan-aman sira iha iha territóriu laran tomak atu lori oan sira asesu ba Pre-Eskolár.

“Labele eskola direta ba Ensinu Báziku, ne’e ha’u hanoin ita  formasaun báziku ladun fundamentu. Ba futuru MEJD sei kolabora hamutuk munisípiu hodi establese eskola Pre-Eskolár ba suku sira ne’ebé seidauk estabelese,” nia akresenta.

Pre-eskolár iha nível nasionál hamutuk 558, iha suku estabelese ona 239 no suku 213 maka seidauk estabelese.

Enkuantu, iha munisípiu Viqueque estabelese ona Pre-Eskolár 27, iha suku sia maka seidauk estabelese.

Biban ne’e, Adiministradór munisípiu Viqueque, Januário Soares ‘Bolly’, konsidera  manorin ba Pre-Eskolár hanesan ema espesiál tanba ema toman maka bele hanorin oan ho idade kiik.

“Ha’u hanoin manorin sira hosi Pre-Eskolár ne’e espesiál tanba ema ne’ebé profisionál maka bele hanorin ita-oan sira ho idade kiik, ema la tomak labele hanorin tanba difirente ho Ensinu Báziku sira. Dala barak ita haree profesór Pre-Eskolár feto maka barak, nune’e oan sira hahú Pre-Eskolár maka tama Ensinu Báziku sei la’o di’ak,” nia realsa.

Atividade sosializasaun matríkula ne’e hahú iha Eskola Pre-Eskolár Halibur Viqueque vila, ne’ebé hetan partisipasaun hosi Administradór munisípiu Viqueque, Januário Soares ‘Bolly’ inklui profesór sira hosi Pre-Eskolár Halibur.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here