Diretór Nasionál Ensinu Rekorrente MEJD, José Artur Viana. Imajen TATOLI/Nelia Fernandes

DILI, 25 abril 2022 (TATOLI)–Ministériu Edukasaun Juventude no Desportu (MEJD) deside halo kontratu formál ho profesór ekivalénsia na’in-45 ne’ebé durante ne’e hanorin iha sentru komunitária aprendizajen iha territóriu nasionál.

“Ha’u kontente tanba ministériu foti desizaun hodi deside destinu klaru ba profesór 45, tanba durante ne’e sira la hetan atensaun, profesór barak maka serbisu fali iha fatin seluk, maibé ho polítika ne’e bele garante profesór ekivalénsia na’in-45 bele halo ona sira-nia serbisu ho hakmatek,” Diretór Nasionál Ensinu Rekorrente (DNER), José Artur Viana, informa ba Agência Tatoli, iha ninia knaar fatin, Vila Verde, segunda ne’e.

Notísia relevante: Profesór Na’in 28 Sei Asina Kontratu Ho MEJD Reforsa Programa Ekivalénsia Iha Munisípiu 12

Nune’e, Diretór ne’e konsidera desizaun ne’e nu’udar pasu atu hahú kesi ona profesór sira atu labele hamosu preokupasaun kona-ba destinu iha futuru no bainhira mosu mudansa ruma bele garante ona sira-nia futuru.

“Profesór sira durante tinan hirak ita halo kontratu maibé la klaru, maibé tinan ne’e liuhosi desizaun ministru, sira-nia kontratu tama hotu ona ba saláriu no vensimentu hamutuk ho profesór formál sira,” nia akresenta.

Desizaun ne’e foti direita hosi Ministru Edukasaun Juventude no Desportu, Armindo Maia atu garante destinu profesór ekivalénsia na’in-45 hanesan mós profesór formál sira, ne’ebé sira-nia dokumentu hotu Rekursu Umanu mak elabora hotu ona, nune’e tempu besik bele submete ba Komisaun Funsaun Públika.

“Bainhira ba oin iha programa ensinu rekorrente mak alunu menus, sira bele ba fali fatin seluk ou bele ba apoiu fali edukasaun formál sira iha eskola seluk, nune’e mós kuandu iha ekivalénsia maka profesór menus bele husu apoiu ba profesór formál sira atu mai hanorin iha ne’e,” nia tenik.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here