Vise-Ministru Interiór, António Armindo. Imajen Tatoli/Francisco Sony

DILI, 25 abril 2022 (TATOLI)-Governu liuhosi Ministériu Interiór (MI) prevee orsamentu hamutuk millaun $3 hodi sosa edifísiu foun ba Servisu Migrasaun. 

Vise-Ministru Interiór, António Armindo, hateten, edifísiu ne’e daudaun hamutuk de’it ho MI nian, maibé tanba edifísiu ne’e privadu, tanba ne’e tenki sosa nune’e instituisaun rua bele koordena servisu di’ak liután hodi serví públiku.

“Hetan orientasaun hosi Primeiru-Ministru (PM) kona-ba edifísiu foun Migrasaun ne’ebé Governu planeia atu sosa iha tinan ida-ne’e. Edifísiu ne’ebé sei sosa iha kedas área Ministériu Interiór. Ida-ne’e mak Governu planu hodi sosa ho orsamentu hamutuk millaun $3,” Vise-Ministru Interiór, António Armindo, informa iha Rezidénsia Ofisiál PM, Farol segunda ne’e.

Notísia relevante: Servisu Imigrasaun Deporta Sidadaun Indonézia Nain 12

Governu iha interese atu sosa tanba edifísiu di’ak no daudaun ne’e iha ona faze diskusaun.

“Di’ak liu sosa de’it ona edifísiu ne’ebé ninia konstrusaun standar no di’ak hodi uza tanba halo foun sei lori tan tempu,” governante ne’e akresenta.

Inisiativa ne’e tanba Servisu Migrasaun laiha edifísiu própriu no daudaun ne’e hamutuk de’it ho MI iha Vila Verde, ne’ebé dalaruma laiha espasu.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here