Membru PN hosi Bankada FRETILIN, Antoninho Bianco. Imajen/ Egas Cristovao

DILI, 25 abríl 2022 (TATOLI)—Vise Prezidente Bankada Frente Revolsionáriu Independente (FRETILIN) iha Parlamentu Nasionál, Deputadu Antoninho Bianco, husu lidér nasionál atu tuur hamutuk hodi ko’alia ba malu lori dezenvolvimentu nasaun ba oin.

“Hanesan ita akompaña durante ne’e no aproveita husu lidér nasionál sira tempu to’o ona tuur hamutuk hodi ko’alia ba malu no rona malu, halo tuir malu ba interese povu hodi lori moris di’ak,” Deputadu Fretilin ne’e levanta iha plenária Parlamentu Nasionál, segunda ne’e.

Bele diferensa polítika no ideia maibé presiza tuur hamutuk, la’ós tempu atu kompara malu sé mak halo barak liu iha rai ida-ne’e.

Prosesu eleisaun prezidensiál ne’ebé la’o liu ba povu hatudu nia maturidade hakmatek no iha esperansa boot ba dezenvolvimentu mak moris di’ak, nune’e lidér sira presiza fó laran ba malu lori prosesu Estadu ba oin.

“Tempu to’o ona hatudu ba jerasaun foun sira, hakbesik no ko’alia ba malu hodi hatutan luta liberta povu hodi mukit no lori moris di’ak ba povu,” nia dehan.

Deputadu KHUNTO, António Verdiál, hateten aseita ho hanoin ne’e hodi hafanu lidér polítiku sira atu hamutuk fó liman ba malu hahoris Estadu ne’e lori moris di’ak ba povu Timor-Leste.

Deputadu Frente Mudansa, Isabel Maria Fretias, felisita kandidatu Prezidente Repúblika na’in-rua ne’ebé konsege lori prosesu demokrásia la’o ho di’ak no susesu lori povu ba prosesu ida ne’ebé hatudu maturidade polítika no demokrátiku.

Nia lori bankada Frente Mudansa nia naran, kongratula mós Prezidente Repúblika eleitu ba períodu 2022-2027.

“Ami-nia felisitasaun mós ba Prezidente eleitu José Ramos Horta no espera katak votu konfiansa ho esperansa futuru ne’ebé prosperu hametin unidade nasionál di’ak, no metin liután hamutuk ho kamada sosiedade tomak no espesiál unidade hosi lidér nasaun tomak,” nia dehan.

Notísia Relevante: CNE konklui apuramentu nasionál no deside votu 1.200 sai válidu

Jornalista : Nelson de Sousa

Editór     : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here