Estudante no komunidade RAEOA tenta atu mai Dili ho Barco Rápido iha portu Mahata. Imajen Tatoli/Abílio Elo Nini.

OÉ-CUSSE, 25 abríl 2022 (TATOLI) – Estudante hamutuk ho komunidade Rejiaun Administrativa Espesiál Oé-Cusse Ambeno (RAEOA) barak mak laiha kbiit atu sosa billete aviaun ZEESM no Barco Rápido tanba presu karun.

Portavós Estudante Oé-Cusse, Imelda de Fátima Lao, ne’ebé reprezenta Movimentu Tane Oé-Cusse (METO), informa relasiona ho loron eleisaun prezidensiál ba períodu 2022-2027, Governu Timor-Leste liuhosi Sekretariadu Tékniku Administrasaun Eleitorál (STAE) no Komisaun Nasionál Eleisaun (CNE, sigla portugés) realiza eleisaun volta daruak iha 19 abríl foin lalais ne’e.

Tán ne’e polítika Governu liuhosi Ministériu Administrasaun Estatál (MAE), iha loron 14 abríl ne’e, anunsia ba eleitór-sira hosi munisípiu 12 prepara karreta kamioneta 1.010, hodi transporta eleitór sira atu fila ba munisípiu hodi ezersie direitu votu, nune’e iha loron 17 to’o 18 abríl ne’e, transporta duni ba munisípiu 12 inklui RAEOA.

“Maibé komunidade hosi RAEOA maioria estudante kuaze na’in-2000 buka alternativa rasik hodi ba partisipa eleisaun iha Oé-Cusse, maske ezerse ona diretu síviku no termina ona rezultadu eleisaun nian, maibé ami estudante Oé-Cusse dilemátiku atu fila fali ba Díli hodi kontinua ami-nia estudu iha nasionál,” Portavos, Imelda de Fátima Lao, informa liuhosi konferénsia imprensa iha portu Kihara Mahata, Oé-Cusse segunda ne’e.

Nia informa, razaun ne’e tanba iha problema mak hanesan, dahuluk, laiha transporte marítima adekuada atubele transporta hikas estudante no komunidade sira ba Dili.

Daruak, ro ahi Berlin Ramelau hetan ona estragu iha loron 17 abríl ne’e iha portu Mahata, Oé-Cusse, nune’e agora laiha nesesidade atu halo movimentasaun ba komunidade sira ho númeru boot iha tempu badak.

Datoluk, barco rápido ho presu billete ne’ebé karun, $15.00 to’o $25.00, ida-ne’e fó impaktu ba estudante sira atu labele viajen, ba aviaun ZEESM nian, nia presu sa’e tán ba $45.00, tán ne’e estudante no komunidade kbiit laek, labele asesu iha presu sira-ne’e.

“Problema hirak-ne’e, Movimentu Estudante Tane Oé-Cusse (METO) lori estudante no komunidade nia lian husu VIII Governu no afirmasau sira hanesan tuir mai ne’e, husu ba Primeiru Ministru, Taur Matan Ruak, atu buka dalan hodi fasilita estudante no komunidade Oé-Cusse oan atu fila-fali ba Díli,” nia afirma.

Nune’e mós, husu ba Ministru Transporte no Telekomunikasaun (MTK) no Diresaun Nasionál Transporte Marítima atu kontrola presu billete ro privada sira-nian, no husu ba Ministru Administrasaun Estatal (MAE), hodi servisu hamutuk ho Ministru Transporte no Telekomunikasaun atu fasilita estudante no komunidade Atoni ho gratuitamente atu fila-fali ba Díli hodi partisipa iha prosesu aprendizajen.

Eugevio Taela, nu’udar estudante UNTL, sente triste ho situasaun ne’e tanba Governu la buka meiu hodi fó solusaun.

“Ami mai iha Oé-Cusse maioria estudante sekundáriu no universitáriu, bazea kaléndariu hosi Ministériu Edukasaun ohin 25 abríl, Timor-Leste realiza ezame primeiru períodu, maibé barak mak la partisipa tanba kestaun transporte,” nia katak.

Nia rekomenda ba Governu ho anternativa rua, dahuluk, daudaun ne’e ro Berlin Ramelau hetan estragu labele halo operasaun hosi Dili ba Oé-Cusse, entaun haree ba kapasidade ba ró barco rápido ne’e ki’ikliu labele transporta estudante sira hotu hosi Oé-Cusse ba Díli tanba tula pasajeiru másimu na’in-250 de’it.

“Tan ne’e maka ami husu ba parte kompetente buka solusaun oinsá mak bele transporta fila-fali Oé-Cusse sira ba Dili hodi hala’o estudu, depois ita haree fronteira terrestre agora loke ona, karik bele buka solusaun nune’e bele transporta pasajeiru estudante liuhosi terrestre de’it,” nia sujere.

Suzario Colo, hosi estudante UNTL, kestioan parte seguransa sira iha RAEOA tanba iha ajente balun hatama subar pasajeiru ka sira-nia família, entaun ema ema pasajeiru seluk la simu atendimentu ne’e.

Nia informa, pasajeiru hosi Oé-Cusse ba Díli maioria estudante hosi universitáriu no sekundáriu, tanba ne’e sujere ba Ministériu Transporte no Telekomunikasaun no Diresaun Nasionál Transporte Marítima atu halo investigasaun kona-ba ró Berling Ramelau.

“Tanba ro ne’e mai ba povu Timor-Leste la’ós mai benfísia de’it grupu balun, tn ne’e tenke halo prosesu investigasaun ba tribulante ba ro refere, sira nia kapasidade mak seidauk bele ka ou ro mak aat, tanba ami agora sai vítima lakon ami nia estudu, tan de’it atu mai vota iha Oé-Cusse,” nia husu.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here