Estudante Sekundáriu Jerál Don Martinho da Costa Lopez Maliana, munisípiu Bobonaro tuir ezame. Imajen Tatoli/Sérgio da Cruz.

BOBONARO, 25 abríl 2022 (TATOLI) – Diretór Servisu Edukasaun Munisípiu Bobonaro, Crispim Moniz, fó-sai katak estudante iha munisípiu ne’e hamutuk na’in-30.429 mak partisipa ona ezame trimestre dahuluk iha tinan letivu 2022.

“Ita iha estudante ne’ebé hahú ohin partisipa ieame primeiru períodu totál partisipante hosi nivél ensinu báziku hamutuk 24.623-resin, ensinu sekundáriu jerál 3.906 no ensinu tékniku vokasionál 1.900-resin,” nia informa ba jornalista sira, iha Ensinu Bázika Sentrál (EBC, sigla portugés) Raifun, postu administrativu Maliana, segunda ne’e.

Lala’ok ezame ne’e tuir kalendáriu ne’ebé fó-sai hosi Ministériu Edukasaun, Juventude no Desportu (MEJD, tanba antes ne’e ligadu ho festa demokrasia volta daruak suspende tiha ezame trimestre dahuluk.

Maibé antés ne’e nia parte halo ona enkontru preparasaun ho dirijente eskola hotu hahú hosi nivel ensinu baziku to’o sekundáriu jerál halo revizaun matéria ba alunu sira hodi nune’e estudante sira bele tuir izame ho di’ak.

Nune’e mós edukasaun munisípiu Bobonaro halo tiha ona planu atu implementa atividade Grupu dos Profesór hodi habi’it estudante sira-nia vontade atu estuda.

“Ami seidauk hahú atividade ne’e tanba ami sei hein profesór sira hosi Portugál, bainhira sira to’o mak ami foin hahú atividade ne’e atubele halo preparasaun ba prosesu apredizajen ho di’ak liután, ami mós fiar katak maske seidauk hahú estudante sira bele ezame ho di’ak,” nia hateten.

Estudante Joel dos Santos, hosi Ensinu Sekundáriu Jerál (ESG, sigla portugés), Don Martinho da Costa Lopez, preparadu ona tanba antes ne’e matéria ne’ebé profesór sira hanorin kompletu ona.

“Ha’u tuir izame sente di’ak oituan, maske foin lalais ita-nia eleisaun no kampaña ami ladún tama aula, maibé matéria iha disiplina hotu-hotu profesór sira esplika hotu ona, ami mós komprende,” nia akresenta.

Totál eskola Ensinu Sekundáriu Jerál hitu, Tékniku Vokasionál ualu,Eskola Bazika Filiál (EBF) 127 no Ensinu Bázika 24 mak realiza ezame trimestre dahuluk tinan letivu 2022.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here