Estudante Eskola ESTV-GTI Becora halo hela reparasaun ba kadeira a’at, iha resintu eskola, segunda (25/04). Imajen Tatoli/ Tomé Amado

DILI, 25 abril 2022 (TATOLI)–Eskola Ensinu Sekundáriu Tékniku Vokasionál-Grupu Teknolojia Indústria (ESTV-GTI) Becora hadi’a ona kadeira a’at hamutuk 150, ne’ebé antes ne’e Ministériu Edukasaun Juventude no Desportu (MEJD) rekolla hosi eskola sira.

“Ami simu kadeira a’at hosi Ministériu Edukasaun Juventude no Desportu hamutuk 256, maibé kadeira 150 mak hadi’a hotu ona, bele dehan atinje ona 68%,  falta de’it 90 resin maka sei iha prosesu reparasaun nia laran,” Xefe Departamentu Mekánika Produsaun, Raimundo da Costa Guterres, informa ba Agência Tatoli iha resintu eskola, segunda ne’e.

Notísia relevante: MEJD entrega kadeira a’at 256 ba Eskola ESTV-GTI halo reparasaun

MEJD fó konfiansa ba Eskola ESTV-GTI tanba hakarak ajuda estudante sira iha atividade extrakurrikulár, nune’e bele hasa’e kapasidade hodi manán esperiénsia iha área ne’ebé sira dezenvolve-an.

Tuir Responsável Departementu ne’e, durante atividade reparasaun, MEJD liuhosi Diresaun Nasionál Tékniku Vokasionál fó fundu hamutuk 1.000 hodi sosa materiál.

“Osan la sufisiente atu hadi’a kadeira 256 ne’e hotu, tanba fundu $1.000 ne’e ekivalente de’it ba kadeira ida $5. Tuir kalkulasaun Diresaun Mekánika Produsaun, kada kadeira $10 resin. Osan sira ne’e ita sei sosa fali materiál inklui prepara hahán ba estudante sira, la’ós sira hotu, maibé ita prepara de’it ba estudante na’in-15 ne’ebé ita deside ona hala’o serbisu to’o lorokraik,” nia haktuir.

Prosesu reparasaun ne’e sei ramata iha tempu besik tanba estudante sira serbisu to’o lorkraik.

“Ha’u mai haree hela de’it kadeira a’at hamutuk 90 resin ne’ebé hadi’a daudaun, ha’u bele dehan to’o lorokraik halo tan kadeira 50, aban hadi’a tan balun ita bele finaliza ona,” nia tenik.

Diretór Eskola ESTV-GTI Becora, Francisco Guterres, esplika fundu ne’ebé eskola hasai ne’e atu apoiu atividade extrakurrikulár ba estudante sira hodi aumenta esperiénsia, ne’ebé kada kadeira $5, ho intensaun estudante bele hetan atividade prátika.

”Ita husu ba Departamentu Mekánika Produsaun atu hatún presu ba $5 ba kada kadeira tanba ne’e atividade prátika no sira konkorda,” nia dehan.

Antes ne’e, iha loron 08 abril 2022, MEJD liuhosi Diresaun Nasionál Ensinu Sekundáriu Tékniku Vokasionál (DNESTV) entrega kadeira a’at hamutuk 256 ba Eskola  ESTV-GTI Becora hodi halo reparasaun.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here