Diretór Jerál Servisu Rejistu Notariadu, Crisogno da Costa Leite, ofísiál entrega sertidaun moris (RDTL) no BI ba sidadaun ida naran Eusebio. Imajen Tatoli/Celestina Teles.

COVALIMA, 25 abril 2022 (TATOLI)—Sekretáriu Administrasaun Munisípiu Covalima, Francisco de Jesus Alves, husu ba líder komutária suku Beiseuk no Lalawa, postu administrativu Tilomar, munisípiu Covalima, mobiliza komunidade atu hasai sertidaun moris (RDTL) no Billete Identidade (BI) iha sede suku. 

Reprezentante admiministradór husu Dirasaun Jerál Rejistu Notariadu hamutuk ho Dirasaun Munisípal Konservatória Servisu Rejistu Notariadu Covalima halo atendimentu trata dokumentu iha suku Lalawa no Beiseuk iha postu administrativu Tilomar durante loron lima (5).

“Ha’u hanoin ida-ne’e oportunidade di’ak tebes ba ita-nia komunidade iha área rurál bele hakbesik an liuhosi rejistu notariadu Covalima mai halo rejistu moris ba ita-nia inan-aman sira mai iha sede suku Lalawa. Líder komunitária sira tenke mobiliza populasuan hotu trata dokumentu,” Autoridade Covalima hato’o ba jornalista sira, hafoin partisipa serimónia lansamentu atendimentu ba komunidade, iha sede suku Lalawa, postu administrativu Tilomar, munisípiu Covalima, segunda ne’e.

Tuir nia, atividade ida-ne’e fasilita inan-aman sira tenke aproveita oportunidade, tanba inan-aman sira ne’ebé laiha forsa atu trata dokumentu sertidaun moris (RDTL) no BI iha Suai Vila.

“Ita-nia inan-aman laiha kbiit no forsa ba munisípiu bele trata dokumentu sertidaun moris no BI ne’e bele hakbesik mai iha sede suku Lalawa hodi trata dokumentu,” nia hateten.

Diretór Jerál Servisu Rejistu Notariadu, Crisogno da Costa Neto esplika, Servisu Rejistu Notariadu realiza atividade ne’e hodi halo atendimentu iha postu administrativu tanba bazea ba dadus sidadaun barak mak seidauk trata dokumentu.

“Ami realiza programa ida-ne’e bazea ba ami-nia dadus sistema demografiku jestaun ita-nia sidadaun ne’ebé mak millaun 1,300-resin, maibe hosi númeru ne’e 300,000 mak foin iha BI millaun ida-resin seidauk iha BI, ida ne’e perigu ba ita-nia Estadu,” nia dehan.

Tanba, nia dehan, nu’udar sidadaun Timor-Leste tenke iha identifikasaun sivil hanesan BI no programa ida-ne’e hahú implementa iha tinan 2021 no iha tinan 2022 hahú implementa iha munisípiu Covalima hanesan iha postu administrativu Tilomar halo atendimentu ba komunidade suku Lalawa no Beiseuk durante loron lima.

Hafoin finaliza iha postu administrativu Tilomar, sira sei kontinua halo atendimentu iha postu adminstrativu Fohorem ne’ebé sei realiza iha Suku Fohorem, Laktos, Dato-Rua no Dato-Tolu

“Iha tinan 2021, ami realiza ona programa ida-ne’e ho projetu pilotu iha postu administrativu Baguia no Quelicai, munisípiu Baucau, ita-nia inan-aman iha foho laiha tempu no sira la tau importánsia. Entaun, ami mak hakbesik ba sira hodi halo atendimentu integradu. Ida-ne’e fasilita sira hodi hetan dokumentu sertidaun moris (RDTL) ho BI,” nia hateten.

Xefi suku Lalawa, Remegio Gomes, hato’o agradese ba Servisu Rejistu Notariadu hodi hakbesik ba komunidade iha área rurál hodi fasalita sira trata dokumentu iha sede Suku Lalawa, tanba komunidade barak mak seidauk trata dokumentu sertidaun moris (RDTL) no BI

“Ha’u-nia komunidade presiza atu trata dokumentu hodi asesu lalais sertidaun moris no BI, tanba durante ne’e sira la ba Suai Vila tanba do’ok, tanba ne’e ha’u hato’o agadese hodi fasilita komunidade trata dokumentu iha sede suku,” nia dehan.

Tuir dadus iha suku Lalawa populasaun hamutuk 490 no hosi hosi númeru ne’e balun trata ona dokumentu hanesan sertidaun moris no Billete Identidade maibé balun seidauk trata.

Tuir planu Servisu Rejistu Notariadu sei halo atendimentu integradu iha munisípiu Bobonaro, Manufahi no Ainaro no munisipiu seluk, maibé sei implementa progama ida-ne’e fazeadamente,  nune’e  sidadaun 99% bele hetan ona BI

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here