Ministru Obra Públika, Abel Pires da Silva. Imajen Tatoli/Francisco Sony

DILI, 22 abril 2022 (TATOLI)—Primeiru-Ministru (PM), Taur Matan Ruak, kontinua ejize ba Ministériu Obra Públika (MOP) hodi rekupera estragu sira ne’ebé impaktu hosi dezastre naturál desde tinan 2020 to’o agora.

“Primeiru-Ministru husu progresu rekuperasaun estragu impaktu kalamidade loron 04 abril 2021. Ha’u relata katak maioria projetu rekuperasaun sira ne’e agora iha prosesu aprovizionamentu iha Komisaun Nasionál Aprovizionamentu (CNA, sigla portugés),” Ministru Obra Públika, Abel Pires, relata hafoin ramata reuniaun ho Xefe Governu, iha Rezidénsia PM iha Farol, sesta ne’e.

Daudaun ne’e ne’e MOP akompaña hela hadi’a trosu ida hosi Manleu sa’e ba Sarlala (Aileu), ne’ebé Ajénsia Dezenvolvimentu Nasionál (ADN) halo hela prosesu verifikasaun.

“Hein katak tinan ne’e prosesu konkursu bele ramata hodi bele komesa hadi’a estrada alternativa ida-ne’e. Ha’u-nia serbisu mak atu hadi’a estragu sira ne’e, ne’ebé iha hotu ona prosesu,” nia otimista.

Notísia relevante: Governu halo esforsu rekupera estragu infraestrutura públiku impaktu hosi kalamidade

Aleinde ne’e, tuir Ministru, ekipa sira tun haree tutuir estrada kuak sira iha kapitál Dili hodi hadi’a.

“Ezemplu estrada iha edifísiu Diresaun Nasionál Transporte Terrestre (DNTT) nia oin, Portu Dili-nia oin, Palásiu Governu nia oin, inklui fatin lubuk ida ami komesa hadi’a ona, maibé estragu barak konserteza sei kontinua haree ida-ne’ebé mak presiza atensaun. Ha’u kontente atu informa estragu lubuk hodi ami hadi’a,” nia akresenta.

Biban ne’e, Xefe Governu orienta MOP atu tau prioridade ba estrada rurál no liña eletrisidade ba suku sira ne’ebé seidauk asesu.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here