Reprezentante WFP iha Timor-Leste, Dageng Liu, aprezenta pakote ai-han nutrisaun hanaran super cereal, liuhosi konferénsia imprensa iha edifísiu WFP, Caicoli, sesta (22/04). Imajen Tatoli/Francisco Sony

DILI, 22 abril 2022 (TATOLI)—Governu Xina oferese millaun $1 ba Programa Ai-han Mundiál (WFP, sigla inglés) hodi halo akizisaun pakote ai-han nutrisaun hanaran super cereal tonelada 500 hosi nasaun Europa hodi apoiu programa má nutrisaun iha Timor-Leste.

Pakote super cereal sei to’o ona iha Aeroportu Internasionál Nicolau Lobato, Comoro iha tempu badak ita sei entrega ba Governu Timor-Leste liuhosi Minitériu Saúde distribui ba inan isin rua no inan fó susu labarik ne’ebé kategoria má nutrisaun,” Reprezentante WFP iha Timor-Leste, Dageng Liu, hateten iha edifísiu WFP, Caicoli, sesta ne’e.

Notísia relevante: Labarik TL 47% má nutrisaun krónika

Parte saúde koko ona ai-han super cereal ba inan isin-rua no inan fó susu, liuhosi koko sira-nia liman kabun leten haree menus hosi númeru 23 mai kraik nia sei hetan super cereal tanba ida ne’e kategoria tama má nutrisaun.

“Ida-ne’e esforsu ne’ebé ita halo hodi kombate má nutrisaun iha Timor-Leste, tanba WFP fornese asisténsia téknika ba Governu Timor-Leste hodi kombate hamlaha no problema má nutrisaun iha forma saida de’it no estabelese sustentabilidade sistema ai-han tuir Planu Estratéstiku Dezenvolvimentu Nasionál 2011-2030,” nia dehan.

Nune’e, peskiza ai-han no nutrisaun iha tinan 2020 ne’ebé konduta hosi Ministériu Saúde, ho apoiu WFP inklui parseiru dezenvolvimentu sira seluk, hatudu katak problema má nutrisaun hanesan rais badak redús hosi 50,2% iha tinan 2013 ba 47% iha tinan 2020.

Nune’e, krekas hosi 11% iha tinan 2013 ba 8,6% iha tinan 2020, iha tempu hanesan má nutrisaun ba inan isin-rua kategoria krekas ho prevalénsia redús hosi 27% iha tinan 2013 ba 25% iha tinan 2020.

“Prosesu hirak ne’e aliña ho WFP nia prioridade atu hadi’a estudu nutrisaun ba labarik, inan isin-rua no inan fó susu sira liuhosi komunikasaun mudansa hahalok no sósiu inklui apoiu tékniku ba Governu,” nia hateten.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here