UKL iha suku Bibileo, sesta (22/04). Imajen Tatoli/Vitorino Lopes da Costa

VIQUEQUE, 22 abril 2022 (TATOLI)—Responsável Programa Nasionál Dezenvolvimentu Suku (PNDS) hamutuk ho Administradór munisípiu Viqueque, sesta ne’e, entrega Uma Kbiit Laek (UKL) ba benefisiáriu na’in-tolu iha aldeia Aisahe, suku Bibileo, postu Viqueque vila.

Iha biban ne’e, Administradór Viqueque, Januário Soares ‘Bolly’, husu ba benefisiáriu atu kuidadu uma.

“Ha’u husu benefisiáriu tenki uza uma ho di’ak no labele abandona ka hela iha fatin seluk. Iha kondisaun balun seidauk iha hanesan bee-moos, maibé ha’u hanoin liuhosi PNDS iha futuru bele instala bee-moos ba komunidade iha suku ne’e, nune’e benefisiáriu UKL bele asesu,” Autoridade munisipál hateten ba Agência Tatoli, iha aldeia Aisahe.

Notísia relevante: Progresu konstrusaun UKL Viqueque atinje 70%

Iha fatin hanesan, Xefe suku Bibileo, Maria Odete dos Anjos Amaral, apresia ho programa UKL hosi Governu no espera programa ne’e bele kontinua nafatin.

“Ha’u agradese ba Governu ne’ebé entrega ona uma ba povu kbiit laek sira, iha faze dahuluk iha benefisiáriu na’in-tolu maka hetan no faze daruak iha benefisiáriu na’in-12 mak sei hetan uma iha suku Bibileo,” nia hato’o.

Administradór Viqueque, Januário Soares ‘Bolly’ simbólikamente ko’a vita iha UKL suku Bibileo, sesta (22/04). Imajen Tatoli/Vitorino Lopes da Costa

Konstrusaun UKL iha suku Bibileo hahú iha agostu 2021 no ramata iha marsu 2022, ne’ebé durante konstrusaun, difikuldade ne’ebé ekipa PNDS hasoru maka kondisaun estrada liga ba fatin harii UKL, tanba tempu udan kareta labele asesu, maibé komunidade tulun lalin materiál ba fatin konstrusaun uma.

“Maski ho kondisaun dalan a’at, maibé ita-nia ekipa PNDS halo esforsu no konsege finaliza konstrusaun UKL ba ita-nia benifisiáriu na’in-tolu. Ohin ita hamutuk entrega xave ba benifisiáriu,” nia akresenta.

Nune’e mós, benefisiáriu UKL, Estevão Amaral, haktuir, durante konstrusaun, benefisiáriu sira apoiu mós serbisu ekipa PNDS  to’o finaliza obra no entrega xave.

“Ami sente kontente tebes ho uma ne’ebé ami simu, maski kondisaun dalan a’at maibé uma konsege finaliza. Ami agradese ba Governu,” nia tenik.

Maski uma finaliza ona, maibé sei iha nesesidade bázika balun mak seidauk iha, tanba ne’e benefisiáriu sira husu tulun ba Governu atu rezolve.

“Ami presiza bee ba haris fatin, agora bee laiha oinsá maka uza haris fatin. Tanba ne’e, husu Governu presiza haree bee-moos no eletrisidade, uma di’ak ona maibé presiza kompleta tan sasán hirak ne’e,” nia akresenta.

Tuir dadus, kustu konstrusaun UKL tolu iha suku Bibileo hamutuk $51.000, aloka ba materiál fábrika $34.845, materiál la’ós fábrika $7.905, orsamentu insentivu ba badaen sira $8.250, operasionál $.3.000, atividade $1.999.73, insentivu ba ekipa jestaun suku $1.000 no orsamentu restu hamutuk $0,27.

Seremónia ne’e partisipa hosi Administradór munisípiu Viqueque, Administradór postu Viqueque vila, inklui komunidade suku Bibileo.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here