Ministru Ensinu Superiór Siénsia no Kultura, Longuinhos dos Santos. Imajen Tatoli/Francisco Sony

DILI, 22 abril 2022 (TATOLI)—Ministru Ensinu Superior Siénsia no Kultura (MESSK), Longuinhos dos Santos, komprometidu sei harii edifísiu foun Institutu Politékniku Betano (IPB) iha tinan ne’e nia laran.

“Iha ha’u-nia mandatu, hahú ha’u simu pose iha loron 22 juñu 2018, ha’u halo kedan vizita ba IPB hodi halo diálogu ho profesór no estudante sira. Ha’u haree kondisaun tolu importante hanesan mukit ba rekursu umanu, finanseira no infraestrutura, halo ha’u hanoin no deside presiza harii edifísiu foun,” Ministru hateten ba Agência Tatoli iha Palásiu Governu, sesta ne’e.

Governante ne’e dehan, hahú mandatu VIII Governu Konstitusionál, konsege rezolve kondisaun hanesan kompleta rekursu umanu hanesan kria ona Konsellu Jerál IPB inklui rekruta funsionáriu sira.

Notísia relevante: Espasu IPB la sufisiente akumula estudante admitidu 345

Daudaun ne’e, ministériu konklui ona avaliasaun ba aprovizionamentu nasionál, ho ninia rezultadu sei aprezenta ba Konsellu Ministru.

“Ha’u simu ona rezultadu aprovizionamentu nasionál iha semana kotuk no tempu besik ha’u sei aprezenta ba Konsellu Ministru atu hetan aprovasaun hodi bele hahú ona konstrusaun, ne’ebé tinan ida-ne’e konstrusaun ba IPB tenke realiza,” nia akresenta.

IPB antes ne’e hasoru difikuldade finanseira, maibé agora kada tinan sempre prevee orsamentu hodi tulun instituisaun ne’e halo akizisaun materiál prátika no tuir mai halo planu konstrusaun edifísiu ne’ebé maka hatudu ona progresu.

Planu konstrusaun foun edifísiu IPB hatuur iha planu estratéjiku dezenvolvimentu nasionál no polítika VIII Governu Konstitusionál atu lori sai hanesan instituisaun pertinente atubele asegura kualidade nu’udar Instituisaun Ensinu Superior.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here