Foos folin sa’e iha merkadu Covalima. Imajen Tatoli/Celestina teles.

COVALIMA, 22 abril 2022 (TATOLI)—Kompradór, Martinho Noronha do Santos, preokupa ho presu nesesidade bázika iha Covalima ne’ebé sa’e makaas hodi fó impaktu ba komunidade nune’e Governu presiza halo intervensaun.

“Ha’u hanesan kompradór preokupa ba folin sasán nesesidade bázika iha merkadu Covalima sa’e fó impaktu mai ami, nune’e ami sira balun defisil atu sosa foos,” Martinho Noronha do Santos hato’o ba Agência Tatoli, iha nia rezidénsia Santa Rosa, sesta ne’e.

Ho nune’e, nia husu ba Governu atu buka solusaun ba problema presu nesesidade bázika iha Covalima ne’ebé mak oras ne’e daudaun sa’e ne’ebé mak afeta ba povu nia moris.

Negosiante Domingas Amaral hateten, presu nesidade bázika sa’e iha merkadu la’ós negosiante faan tuir sira-nia hakarak maibé presu sasán nesesidade bázika ne’ebé faan iha merkadu nasionál mós sa’e.

“Agora ami fa’an foos ne’e ho folin $13,50 to’o $14,50, ami sosa foos iha merkadu nasionál ho nia presu $13,25 no balun mós iha folin $14,25. Hanesan folin mina Bimoli, antes ne’e $5,00 maibér agora sa’e ona ba $10,00, ami hola kaixa ida ho presu $38,00,” nia informa.

Presu nesesidade bázika sa’e iha merkadu la’ós negosiante sira faan tuir sira-nia hakarak maibé prezu nesesidade bázika iha merkadu nasionál no internasionál mós sa’e, entaun negosiante sira mós tenke hasa’e presu nesesidade bázika.

Enkuantu, presu foos saka ida ho kilograma 25 presu antes ne’e $12,50 maibé bele $13,50 no agora sa’e to’o $14,50 no presu mina litru lima antes ne’e ho presu $5,00 maibé sa’e ona ba $10,00.

Administradór Munisípiu Covalima, Francisco de Andrade, rekuñese presu nesesidade bázika sa’e la’ós iha covalima de’it maibé iha munisípiu seluk mós presu nesesidade bázika sa’e no presu konvustível sa’e.

“Presu nesesidade bázika no konvustível sa’e tanba afeta hosi funu nasaun Ukrania ho Rusi. La’ós Timor de’it maibé kuaze nasaun tomak iha mundu, ita hatene katak bainhira Rusia ho Ukrania hahú funu sasán folin sa’e la’os iha Covalima de’it maibé iha Timor laran,” Autoridade Covalima klarifika.

Maske presu nesesidade bázika iha merkadu sa’e hahú iha fulan janeiru to’o ohin loron  nia parte la bele halo intervensaun bainhira presu nesidade bázika iha merkadu nasionál sa’e .

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here