Estudante Ekola CAFE simu vasina Pfizer, iha Eskola CAFE, Beloi, sesta (25/03). Imajen TATOLI/Vitorino Lopes da Costa

OÉ-CUSSE, 22 abríl 2022 (TATOLI) – Estudante ho tinan 12 to’o 18 hamutuk na’in-1.764 (5,62%) iha Rejiaun Administrativa Espesiál Oé-Cusse Ambeno (RAEOA) partisipa ona kampaña vasinasaun vasina Pfizer, hodi hasa’e imunidade prevene-aan hosi moras COVID-19.

Sekretáriu Rejionál ba Asuntu Saúde, Manuel da Costa, hatete, implementasaun kampaña vasina Pfizer ba oan-sira tinan 12 to’o 18, lansa dahuluk iha RAEOA iha loron 7 abríl, no alvu iha kampaña ne’e envolve labarik na’in-9.708 mak tarjetu ba rejiaun nian, ne’ebé kabe ba eskola hamutuk 101 hosi enisnu báziku to’o sekundáriu.

“Hosi 7 abríl to’o agora ita atinje ona 5,62% ne’ebé mak ita-nia oan sira simu ona vasina Pfizer mai hosi labarik 1.764 mak koopera ona ho fasilidade saúde simu vasina, tantu eskola no la eskola maibé idade minoridade, ne’e katégoria tama iha alvu Pfizer,” Manuel da Costa, ko’alia ba jornalista sira iha Sikluli, sub-rejiaun Pante Makasar, Oé-Cusse, sesta ne’e.

Tuir kaléndariu hosi Ministériu Saúde katak, vasina Pfizer tenke remata iha fulan-maiu tinan ne’e iha rejiaun Oé-Cusse, tanba iha munisípiu 12 kuaze konklui ona.

“Ita agora kontinua intensifika ba labarik sira hotu, ita espera katak iha maiu tenke remata, nune’e ita bele garante oan-sira iha ona imunidade atu hasoru moris COVID-19 iha Oé-Cusse,” nia akresenta.

Sekretáriu Rejionál ba Asuntu Saúde ne’e, fó sai katak, estoke vasina Pfizer iha RAEOA sei sufisiente hodi halo vasinasaun tanba antes ne’e Ministériu Saúde (MS) apoia viál 390 ba Oé-Cusse, daudaun ne’e balu halo ona vasina, hela de’it viál ualu mak sei iha armazein ai-moruk, maibé parte autoridade mós prepara ona hodi submete ona pedidu iha nasionál atu apoia tán vasina Pfizer.

Entretantu, persentajen ba vasina AstraZeneca ba doze dahuluk iha RAEOA daudaun ne’e atinje ona 85,6% no doze kompletu atinje ona 75,4%.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here