Diretór Ezekutivu ANAAA, Edmundo da Silva Viegas. Imajen Tatoli/Francisco Sony

DILI, 22 abril 2022 (TATOLI)–Ajénsia Nasionál Avaliasaun Akreditasaun Akadémiku (ANAAA) ezekuta ona 14,29% hosi Orsamentu Jerál Estadu (OJE) 2022 iha trimestre dahuluk.

“Orsamentu alokadu ba ANAAA iha tinan 2022 ho totál $368.416, maibé ami seidauk halo avaliasaun iha trimestre dahuluk. Tanba ne’e ami-nia ezekusaun orsamentu ba primeiru trimestre foin atinje 14,29% ekivalente ba orsamentu konsege ezekuta ona $52.630,” Diretór Ezekutivu ANAAA, Edmundo da Silva Viegas, hateten ba Agência Tatoli, iha ninia knaar fatin, Balide, sesta ne’e.

Enkuantu, hosi janeiru to’o 21 abril nian, ezekusaun atinje ona 16% ekivalente ho $57.216.

“Ezekusaun ajénsia nian la’o neineik, la tuir regra ezekusaun normál ne’ebé deside ona katak ezekusaun trimestrál tenke atinje 25%,” nia akresenta.

Notísia relevante: ANAAA prevee $371.000 avalia instituisaun haat no implementa programa prioridade

Iha trimestre dahuluk, ANAAA uza osan hodi halo kontaktu ho universidade no Instituisaun Ensinu Superior (IES) sira.

“Ita konsege simu kursu lubuk ida ne’ebé atu hetan akreditasaun. Tanba ne’e iha marsu liubá, ANAAA hahú halo akompañamentu ba instituisaun no departamentu sira hodi distribui formatu avaliasaun ba sira,” nia tenik.

Instituisaun no departamentu sira hahú hakerek relatóriu, iha instituisaun haat sei halo akreditasaun ba dahuluk no ANAAA hahú prevee ona kursu 42 inklui iha kursu 14 maka sei hakat ba re-akreditasaun ba daruak no kursu 28 sei hakat ba akreditasaun foun.

“Ezekusaun OJE iha ne’ebé de’it sempre la’o hanesan, prosesu ezekusaun iha trimestre dahuluk, ninia lala’ok ezekusaun normalmente hahú ho atividade ida ko’alia ba malu uluk lai hodi hakat ba prosesu preparasaun ida,” nia salienta.

Tuir Diretór Ezekutivu, programa trimestre dahuluk ba tinan oin sei halo hotu ninia preparasaun iha ezekusaun ikus tinan ida-ne’e, atu nune’e bele hakma’an serbisu todan iha tinan oin.

Aleinde ne’e, ANAAA hein iha trimestre daruak bainhira kursu balun iha universidade ka IES sira prontu ona sei hahú halo avaliasaun, ho nune’e maka ezekusaun ba orsamentu sei sa’e tanba pagamentu ba avaliadór nasionál no internasionál.

“Bainhira avaliasaun ne’e maka realiza iha trimestre daruak, ANAAA sei realiza uluk seremónia lansamentu hanesan tinan-tinan, ne’ebé sei realiza iha maiu ka juñu hodi lansa akreditasaun tinan 2022, hafoin sei tuir ho formasaun ba avaliadór no tipu semináriu ba reitór sira,” Edmundo dehan.

ANAAA aloka orsamentu $371.426 iha tinan 2022, kompostu hosi saláriu no vensimentu $5.318, bens no servisu $363.098, kapitál menór, kapitál dezenvolvimentu no transferénsia públika laiha.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here