Ekipa Sekretariadu Tékniku Administrasaun Eleitorál (STAE) Munisípiu Bobonaro, tula hela urna sensitivu hodi prepara transporta ba nasionál. Imajen Tatoli/Sérgio da Cruz.

BOBONARO, 21 abríl 2022 (TATOLI) – Sekretariadu Tékniku Administrasaun Eleitorál (STAE) Munisípiu Bobonaro, kinta ne’e transporta ona urna sensitivu ba salaun apuramentu nasionál hafoin finaliza  apuramentu munisipál eleisaun prezidensiál volta daruak.

Diretór STAE Munisípiu Bobonaro, Mariano Viegas Amaral, fó-sai katak loloos ne’e urna sensitivu ne’e transporta kedas dezde loron-kuarta ne’e, maibé tanba eletrisidade mate prosesu apuramentu atrazu nune’e foin finaliza iha 17:30.

Maibé tanba kondisaun tempu rai komesa nakaras ona, nune’e STAE, CNE observadór nasionál, internasionál no fiskál kandidatu na’in-rua deside deskansa no loron-kinta, tuku 10:00 mak foin transporta ba nasionál.

“Ami tau xave hotu ona ba urna senstivus sira-ne’e, ohin ami sei lori akta apuramentu munisípiu votu nulu ho vots reklamadu entrega ba CNE iha sentru apuramentu nasionál,” nia informa ba jornalista sira iha kna’ar fatin, Maliana.

Prosesu transportasaun urna sensitivu ba sentru apuramentu nasionál ne’e superviziona hosi Komisaun Nasionál Eleisaun (CNE, sigla portugés), fiskál kandidatu na’in-rua no hetan seguransa másima hosi Polísia Nasionál Timor-Leste komandu munisípiu Bobonaro no Batallaun Orden Públika (BOP) na’in-sia.

Entretantu, Komandante PNTL Munisípiu Bobonaro, Superintendente Antoninho Mauluta, fiar katak orden seguransa ne’ebé hatún ba membru sira klaru ona tanba ne’e sei asegura materiál hirak ne’e ho susesu to’o nasionál.

Rezultadu apuramentu munisipál hatudu katak kandidatu Prezidente Repúblika ho númeru sorteiu (1), José Manuel Ramos Horta, gaña ho votu 35.536 (68,46%) iha Bobonaro no Francisco Guterres ‘Lú Olo’ hetan votu 16.371 (31,54%).

Totál eleitór ne’ebé ezerse direitu votu iha eleisaun prezidensiál iha Bobonaro na’in-52.499 inklui sentru votasaun paralelu na’in-379 hosi totál eleitór 70.311, votu nulu 408 (0,78%), votu reklamadu 45 (0,09%), rezeitadu sia (0,02%), branku 130 (0,25%), nune’e totál votu válidu 51.907 (98,87%).

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here