DILI, 21 abril 2022 (TATOLI)—Profesór portugés ba Eskola Referénsia Lian Portugés, Centros de Aprendizagem e Formação Escolar (CAFE) hamutuk na’in-92 sei to’o Dili semana oin.
“Iha tan profesór hamutuk 123 sei koloka tan iha Eskola CAFE ba tinan 2022 ne’e. Hosi númeru ne’e profesór na’in-92 mak sei to’o uluk iha Dili hosi Portugal iha loron 25 abril tuku 06:00 dadeer ho aviaun EuroAtlantic,” Koordenadora Timor-oan ba Eskola CAFE, Antonieta de Jesus, informa ba Agência Tatoli, iha ninia knaar fatin, Villa Verde, kinta ne’e.
Notísia relevante: Profesór timor-oan 219 hanorin iha Eskola CAFE
Tuir akordu ne’ebé nasaun rua halo ona, kada tinan Governu Portugal sei haruka ninia profesór sira mai Timór atu reforsa ensinu aprendizajen.
Profesór seluk seidauk bele mai no tenke adia viajen, enkuantu na’in-neen iha ona Dili desde fulan-fevereiru.
“Profesór foun na’in-20 sei hein hela voo hosi Portugal mai Timór no tuir planu sei to’o iha fulan-maiu, ne’ebé sira-nia viajen hetan ona aprovasaun hosi Ministru Edukasaun Juventude no Desportu, Armindo Maia,” nia akresenta.
Koordenadora dehan, sei tau prioridade ba Eskola CAFE ne’ebé hetan ona ezame nasionál, espesiál liu ba ensinu báziku terseiru siklu 9o ano no ensinu sekundáriu 12o ano tuir nesesidade eskola nian.
Tinan kotuk profesór portugés sira ne’ebé mak hanorin iha Eskola CAFE hamutuk 136 inklui profesór timor-oan na’in 219.
Daudaun ne’e, Governu estabelese ona Eskola CAFE hamutuk 16 iha territóriu tomak, kompostu hosi edukasaun Pre-Eskolár to’o Ensinu Sekundáriu Jerál.
Estudante Eskola Referénsia hamutuk 50.000 foin ba dahuluk partisipa iha ezame nasionál iha tinan kotuk.
Projetu CAFE iha objetivu tolu hanesan proporsiona edukasaun públika ho kualidade ho uzu lian portugés ba ensinu disiplina hotu, proporsiona formasaun lian portugés ba universtáriu ne’ebé foin gradua no ba profosór foun sira inklui proporsiona formasaun no reforsa kapasidade profesór no administradór eskola públika lokál.
Jornalista : Tomé Amado
Editora : Julia Chatarina
