DILI, 21 abríl 2022 (TATOLI— Prokuradór Jerál Repúblika (PJR), Afonso Lopez, kinta ne’e, fó pose ba ofisiál Ministériu Públiku nain-21, kompostu hosi feto na’in-12 no mane na’in-sia, hodi haforsa servisu judisiáriu iha tribunál sira.
“Ohin loron orgullu tebes, tanba ha’u fó pose ba ofisiál Ministériu Públiku nain-21 atu koloka ba koloka ba iha Tribunál Baucau no Suai,” PJR ne’e hateten ba ba jornalista sira salaun auditóriu Ministériu Justisa-Caicoli, kinta ne’e.
Emposadu na’in-21 ne’e kompleta ona formasaun durante fulan-neen Sentru Formasaun Judisiáriu iha área juridiku no ramata ona estájiu ka prátika durante tinan ida iha Tribunál Baucau no Suai.
Nune’e, Konsellu Superiór Majistratura Judisiáriu deside hodi koloka ofisiál MP nain-12 ba iha TribunÁl Distrital sira, hanesan Baucau, Suai, Dili no seluk koloka iha Gabinete kombate korrupsaun Prokuradória Jerál Repúblika nian.
“Husu emposadu sira atu aproveita oportunidade ho diak hodi aprende didiak atu sai ema ne’ebé kualidade fiha fó asisténsia serbisu ba povu ho di’ak,” PJR ne’e ekoraja.
Iha fatin hanesan, Ministru Justisa, Tiago Amaral Sarmento, sente kontente no husu ba emposadu sira atu aproveita didiak oportunidade hodi serbí sidadaun ho resposabilidade ne’ebé ho dezempeñu ka funsaun di’ak.
“Ita presiza ofisiál justisa no ofisiál Ministériu Públiku iha atendimentu inskrisaun iha prosesu julgamentu iha tribunál sira no Prokuradoria Jerál Repúblika rasik. Nune’e rekursu sira ne’e importante atu haforsa serbisu tribunal sira nian hodi gó atendimentu ba kazu sira,” Governante ne’e agradese.
Seremónia pose ne’e partisipa hosi Ministru Justisa, Tiago Amaral Sarmento, Prezidente Tribunál Rekursu Deolindo dos Santos, Prokuradór sira no direjente sira iha Ministériu Justisa no Prokuradoria Jerál Repúblika inklui konvidadu sira.
Jornalista: Natalino Costa
Editór : Florencio Miranda Ximenes
