Ministra Saúde Odete Maria Belo, entrega termu nomeasaun ba kargu xefia sira iha HoREX Baucau, kinta (21/04). Imajen Tatoli/Natalino Belo.

BAUCAU, 21 abríl 2022 (TATOLI) – Ministra Saúde Odete Maria Belo, kinta ne’e nomea kargu xefia sira ho objetivu atu hasa’e kualidade atendimentu iha Hospitál Rejionál Eduardo Ximenes (HoREX) Baucau.

Desizaun refere bazea ba despaxu karta Komisaun Funsaun Publika (CFP, sigla portugés) númeru 4683/2022/CFP kona-ba konsiderasaun informasaun ofísiu númeru 101/MS/CFP/III/2022, loron 17 marsu ne’ebé trata nomeasaun no subtituisaun kargu diresaun xefia iha HoREX Baucau.

Aprova estrutura HoREX númeru 8/2017, loron 29 marsu bazea ba lei númeru 7/2019, loron 15 jullu kona-ba CFP hala’o rekrutamentu, nomeasaun no promove setór públiku.

“Ami halo nomeasaun tanba xefia balun halo serbisu durasaun tinan-hitu entaun ita hakarak halo mudansa haree fali pesoál sira-ne’ebé iha esperiénsia serbisu hamutuk ho sesante sira, ita espera katak sira mós iha ideia, inovasaun atu hadi’a ospitál ida-ne’e,” Ministra Saúde, Odete Maria Belo hateten iha Vila Nova.

Governante ne’e husu direjente xefia foun iha HoREX atu iha animu serbisu nune’e bele hasoru konsidaun ka difikuldade ne’ebé HoREX hasoru, liuliu atu kompleita hadi’a kondisaun no atendimentu ba pasiente sira ho profisionál liután durante mandatu.

“Ita nomea de’it maibe kuandu presiza tuir teste hamutuk ho CFP maibé la taka dalan ba ita atu bele nomea bainhira ita presiza,” Odete akresenta.

Simão Soares simu kna’ar nu’udar Diretór Administrasaun Finansa no Aprovizonamentu foun sei kolabora ho funsionáriu hotu atu indentifika problema iha HoREX hodi hadi’a problema rekursu umanu liuliu doutór espesialista sira ne’ebé menus.

“Ha’u sei servisu hamutuk ho ha’u-nia diresaun tomak buka dalan atu hadi’a hodi hamenus transferénsia pasiente ba Dili,” Simão hateten.

Kargu xefia nomea hosi KFP bazea ba dekretu-lei númeru 25/2016, 29 juñu kona-ba kargu rejime diresaun xefia administrasaun públika

Nune’e Prezidente CFP uza nia kompeténsia ne’ebé prevista iha lei númeru 7/2009, loron 15 jullu kona-ba kriasaun CFP konjuga ho kompeténsia prezidente KFP ne’ebé deside iha pontu rua (2) katak nomea funsionáriu hodi subtitui no ezerse funsaun diresaun xefia iha HoREX Baucau ho mandatu to’o loron 30 juñu 2022, loron konklui ba prosesu selesaun méritu.

Kargu xefia sira-ne’ebé nomea mak hanesan Simão Soares nu’udar Diretór Admistrasaun Finansa no Aprovizonamentu, Umbelina Freitas de Almeida nu’udar Diretora Apoia Diagnótiska Terapeutika, Sebastião Amaral asumu kna’ar nu’udar Xefe Departementu Planu, Rekurusu Umanu no Estatístika, Luciano Sanches da Cruz nu’udar Xefe Departamentu Administrasaun Finansa no Lojístika.

Nune’e mós Claudino Ximenes nu’udar Xefe Departamentu Emejénsia no Ambulatóriu, Alcino Timotéo Gaio nu’udar Xefe Departementu Bloku Operatóriu, Euclídio dos Santos nu’udar Xefe Departamentu Apoia Klínika, José António Maria Espírito Santo nu’udar Xefe Departamentu Medisina Interna no Pediátria no Jacinto Vaz nu’udar Xefe Departamentu Sirurjia no Obstetrítika.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here