Diretór STAE Munisípiu Bobonaro, Mariano Viegas Amaral. Imajen Tatoli/Sérgio da Cruz.

BOBONARO, 21abríl 2022 (TATOLI) – Diretór Sekretariadu Tékniku Administrasaun Eleitorál (STAE) Munisípiu Bobonaro, Mariano Viegas Amaral, fó-sai katak totál eleitór iha munisípiu ne’e 24% mak la tuir votasaun iha eleisaun prezidensiál volta daruak iha loron 19.

“Ami rejista sira-ne’ebé mai vota hamutuk 52,499 (75,07%), quer dizer hosi ida-ne’e ita iha eleitór 24% la mai tuir votsaun iha eleisaun loron rua liubá, depois ita haree eleisaun volta dahuluk taxa partisipasaun sa’e ho totál 77,72%, maibé iha volta daruak ne’e tún fali ba 75,07%,” nia informa ba jornalista sira, iha kna’ar-fatin bairru Sene, suku Holsa, Maliana, kinta ne’e.

Diretór ne’e salienta, lei la obriga eleitór sira atu partisipa hotu eleisaun, maibé tuir STAE nia haree taxa partisipasaun menus oituan tanba prosesu votasaun iha loron 19 liubá situasaun klima ladún diak nune’e eleitór barak labele hakat ba sentru votasaun hodi ezerse sira-nia direitu votu.

“Ami durante ne’e esforsu maka’as iha volta dahuluk tanba ita iha votu nulu totál 1.633, maibé iha volta daruak ne’e ita iha de’it votu 408, signifika iha redusaun duni, realidade tuir ami-nia haree votus nulu sei iha-ne’e la’ós ema sira analfabetu mak halo, maibé ita sira iha koñsimentu ne’e mak votu nulu tanba votu ne’e maioria hakerek no halo dezenu fali,” nia esplika.

Rezultadu apuramentu munisipál hatudu katak kandidatu Prezidente Repúblika ho númeru sorteiu (1), José Manuel Ramos Horta, gaña ho votu 35.536 (68,46%) iha Bobonaro no Francisco Guterres ‘Lú Olo’ hetan votu 16.371 (31,54%).

Totál eleitór ne’ebé ezerse direitu votu iha eleisaun prezidensiál iha Bobonaro na’in-52.499 inklui sentru votasaun paralelu na’in-379 hosi totál eleitór 70.311, votu nulu 408 (0,78%), votu reklamadu 45 (0,09%), rezeitadu sia (0,02%), branku 130 (0,25%), nune’e totál votu válidu 51.907 (98,87%).

PNTL Bobonaro kongratula komunidade

Komandante Polísia Nasionál Timor-Leste Munisípiu Bobonaro, Superintendente Antoninho Mauluta, kongratula komunidade nia maturidade tanba koopera ho membru sira garante pás no establidade iha eleisaun prezidensiál volta daruak to’o faze apuramentu munisipál konklui ho susesu.

“Ha’u lori komandu nia naran hato’o parabéns, agradese no obrigado barak ba ita-nia joven sira ho komunidade munisípiu Bobonaro tanba fó ona konstribuisaun másimu durante preparasaun eleisaun mai to’o agora seguransa ba buat hotu-hotu la’o ho di’ak,” nia apresia.

Komandante haktuir, maske iha tersa loron 19 kalan liubá durante prosesu kontajen votu la’o hela derrepente eletrisidade mate kuaze minute 20, joven balun iha kapitál Maliana hemu lanu halo provokasaun ba malu, maibé asaun sira-ne’e  konsidera normál tanba laiha indísiu ba krime ho nune’e PNTL nafatin firme tuir orden komandu garante establidade.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here