Komandante PNTL Munisípiu Bobonaro, Superintendente Antoninho Mauluta. Imajen Tatoli/Sérgio da Cruz.

BOBONARO, 20 abríl 2022 (TATOLI) – Polísia Nasionál Timor-Leste (PNTL) Munisípiu Bobonaro, detein joven mane ida hafoin ezerse direitu votu publika buletin votu iha mídia sosiál tanba hahalok kontra Lei Eleitorál ba Prezidente Repúblika no regulamentu eleisaun nian.

Polísia Nasionál Timor-Leste (PNTL) Munisípiu Bobonaro, detein joven mane ida hosi área komplex Hauba, suku Mauli-Ubu, postu administrativu Bobonaro, munisípiu Bobonaro, tanba publika buletin votu iha mídia sosiál ne’ebé nia rasik ezerse ona direitu iha sentru votasaun laran ba kandidatu Prezidente Repúblika ida.

Kronolojia hosi krime eleitorál ne’e katak, eleitór refere antes atu tama sentru votasaun, ofisiál eleitorál sira sei halo uluk pasa-revista ba ninia sasán ne’ebé lei bandu maibé la konsege deteta tanba nia tau kalsa badak sikat subar telemovel no tama vota depois hasai foto hotu la’o sai liu ba uma.

“Ami rona informasaun katak ita-nia eleitór mane ida nia vota tiha nia foto publika iha mídia sosiál, ita haree ida-ne’e krime eleitorál, entaun rona imformasaun hosi CNE, membru sira ba kaptura kedas no asegura hodi transporta kedas mai komandu munisípiu atu halo prosesu identifikasaun ba eleitór ne’e,” Komandante PNTL Munisípiu Bobonaro, Superintendente Antoninho Mauluta, informa ba jornalista sira, iha Maliana, kuarta ne’e.

Daudaun ne’e parte seksaun investigasaun konklui ona prosesu identifikasaun ba kazu ne’e no suspeitu detein hela iha sela detensaun komandu munisípiu hodi prepara atu submete ba Ministériu Públiku (MP).

“Ami seidauk hatene nia vota ba sé, maibe nia hasai de’it fotografia, agora ita hein prosesu tuir mai mak bele hatene loloos, iha prosesu nia laran ita husu nafatin apoiu hosi CNE no STAE nune’e bele haree likus ba prosesu ne’e tanba tempu ne’ebá imformasaun mai hosi sira, depois pasa informasaun mai ami mak foin kaptura eleitór ne’e,” nia katak.

Iha parte seluk, Polisía komandu PNTL munisípiu Bobonaro, Superintendente Antoninho Mauluta, orienta ona membru sira aperta seguransa iha salaun Sekretariadu Tékniku Administrasaun Eleitorál (STAE) nune’e prosesu apuramentu munisipál bele la’o ho situasaun pás no estabilidade.

“Ha’u hanoin ita liga ho informasaun ne’e mai hosi parte oinoin ida-ne’e mak oras ne’e daudaun ita aperta nafatin seguransa iha fatin apuramentu atu garante to’o iha apuramentu munsipál remata no transporta materiál sira ne’e ba nasionál,” nia hateten.

Nia dehan, daudaun ne’e membru junta ho Batallaun Oden Públika (BOP) kontinua mantein iha komandu PNTL munisípiu Bobonaro atu garante seguransa.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here