Diretór Servisu STAE munisípiu Viqueque, Humberto Fernandes, fó sai rezultadu apuramentu eleisaun prezidensiál segunda volta munisípiu Viqueque, iha salaun apuramentu, kuarta (20/04). Imajen TATOLI/Vitorino Lopes da Costa

VIQUEQUE, 20  abril 2022 (TATOLI)—Kandidatu Prezidente Repúblika (PR), Francisco Guterres ‘Lú Olo’ lidera kontajen votu eleisaun prezidensiál segunda volta tinan 2022 iha munisípiu Viqueque ho votu 29.164 (68,24%), kontra José Ramos Horta 13.572 (31,76%).

Rezultadu ne’e fó sai hosi Sekretariadu Tékniku Administrasaun Eleitorál (STAE) munisípiu Viqueque hafoin konklui apuramentu munisipál.

“Ita hahú halo kontajen iha loron 19 abril kalan no ohin ita konsege finaliza,” Diretór Servisu STAE munisípiu Viqueque, Humberto Fernandes, hateten ba Agência TATOLI, iha salaun apuramentu munisipál, kuarta ne’e.

Notísia relevante: STAE Viqueque distribui materiál eleisaun segunda volta ba sentru votasaun

Nune’e, ofisiál kandidatu na’in-rua, STAE munisipál inklui Komisaun Nasionál Eleisaun (CNE, sigla portugés) sei asina akta hanesan sasin ba rezultadu apuramentu.

Tuir dadus hosi STAE munisípiu Viqueque, eleitór rejistadu hamutuk 57.099, totál votante ne’ebé partisipa votasaun 43.158 ho taxa partisipasaun 74,53%, votu nulu 331 (0,77%), votu branku 77 (0,18%), votu reklamadu 9 (0,02%), votu rejeitadu 4 (0,01%), votu abandonadu 1 no votu validu hamutuk 42.736 (99,02%).

Transporta rezultadu apuramentu ba nasionál

STAE Viqueque akompaña ho CNE transporta ona rezultadu apuramentu hafoin konklui kontajen votu.

“Ohin, ita kontinua lori ita-nia akta rezultadu apuramentu ba CNE nasionál hodi kontinua halo apuramentu nasionál,” Diretór Servisu STAE informa.

Iha fatin hanesan, Komisáriu CNE destakadu munisípiu Viqueque, Olávio da Costa Monteiro Almeida, agradese ba povu Viqueque ne’ebé kolabora di’ak ho órgaun eleitorál hodi ohin konsege konklui serbisu.

“Ohin ita asina ona akta apuramentu provizóriu munisípiu Viqueque nian, signifika katak prosesu eleisaun no kontajen apuramentu ramata ho susesu no laiha problema,” nia hato’o.

Durante apuramentu no transporta rezultadu munisipál hetan akompañamentu hosi Komisáriu CNE, observodór internasionál Uniaun Europeia (UE), Provedoria Direitu Umanu Justisa (PDHJ, sigla portugés) no hetan seguransa másima hosi Polísia Nasionál Timor-Leste (PNTL).

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here