Votante sira forma tuir liña molok ezerse sira-nia deréitu votu iha elisaun prezidensiál segunda volta iha sentru votasaun eskola Númeru 5 Comoro, tersa (19/04). Imajen Tatoli/Antonio Daciparu.

DILI, 19 abril 2022 (TATOLI)—Xefe Suku Bemori, Cristalina Pereira Soares de Oliveira, espera entre kandidatu na’in rua (2) ne’ebé ida eleitu ba Prezidente Repúblika 2022-2027 tenke kumpre promesa kampaña eleitorál durante hato’o kompromísu polítika iha kampaña daruak ba eleisaun prezidensiál segunda volta ne’e.

Xefe Suku Bemori, Cristalina Perreira Soares de Oliveira. Imajén/Osória Marques.

“Ha’u-nia esperansa ba ita-nia kandidatura Prezidente na’in rua (2) ne’ebé mak ida eleitu ba Prezidente Repúblika 2022-2027 ne’e tenke realiza promesa sira-ne’ebé hala’o iha tempu kampaña eleitorál. Tanba, ita-nia povu ne’e la’ós beik ona, eleisaun dala hira ne’e halo povu sai matenek liután, ne’ebé sira haree hotu lala’ok saida mak durante ne’e ita-nia Prezidente sira eleitu liubá halo,” Cristalina Pereira Soares de Oliveira hateten ba Agência Tatoli iha nia knar fatin, sede suku Bemori, Dili, tersa ne’e.

Hosi buat hirak ne’e, nia dehan, povu sei tetu hodi hili kandidatu Prezidente Repúblika ida-ne’ebé mak sei sai Prezidente Repúblika, tanba ne’e husu ba kandidatu PR ne’ebé karik eleitu tenke kumpre buat sira-ne’ebé sira promote iha kampaña, nune’e povu nia fiar ne’e labele lakon.

Nune’e mós, kandidatu Prezidente Repúblika ba Períodu 2022-2027 ne’e bainhira eleitu tenke sai mós aman ba Nasaun, nune’e bele hadi’a dezenvolvimentu iha Timor-Leste liuhosi kria pás, estabilidade no kria mós kampu trabalhu ba joven sira labele ba servisu iha ema-nia rain.

Maske nune’e, Autoridade Lokál ne’e sente kontente tanba iha eleisaun prezidensiál segunda volta ne’e taxa partisipasaun menus liu kompara kompara ho eleisaun prezidensiál primeira volta ne’ebé komunidade nia partisipasaun ne’e aas tebes.

“Parte seluk ha’u sente triste, tanba ita-nia komunidade la partisipa másimu iha eleisaun segunda volta ne’e. Hanesan, ha’u haree iha suku Bemori komunidade nia partisipasaun mínimu la hanesan ho eleisaun primeira volta. Ohin, partisipasaun ladun, ida-ne’e ha’u-nia hanoin dala ruma ema sira-ne’ebé foin daudaun la ba vota iha sentru paralelu, sira fila hotu ba sira-nia munisípiu. Ida-ne’e mak ha’u-nia haree,” nia dehan.

Entretantu, tuir dadus hosi Xefe Suku Bemori, Cristalina Perira Soares de Oliveira, relata katak eleitór ne’ebé hela iha suku Bemori ne’e hamutuk 4859.

Jornalista : Nelia Fernandes

Editór       : Cancio Ximenes 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here