Prezidente Partidu CNRT, Kay Rala Xanana Gusmão hala’o votasaun iha posto administrative cristo rei suku balibar, Dili, tersa (19/04). Imajen TATOLI/Egas Cristóvão

DILI, 19 abríl 2022 (TATOLI)— Prezidente Partidu Kongresu Nasionál Rekonstrusaun Timor-Leste (CNRT, sigla portugés), Kay Rala Xanana Gusmão, husu ba sidadaun hotu atu respeita desizaun povu nia iha eleisaun segunda volta tanba kandidatu na’in-rua ne’e, ida ne’ebé mak mánan sai Prezidente ba povu tomak nian.

“Estadu demokrátiku ne’e iha povu nia liman ne’ebé ita tenke respeita hodi kontribui. Husu de’it ba povu tomak, grupu hotu-hotu labele provoka situasaun. Tanba ita tinan 20 ukun-an tenke hatudu maturnidade polítika iha situasaun oin-oin. Tanba ne’e labele hatudu inmaturnidade hodi ameasa ka kria konflitu,” Xanana hateten ba Jornalista sira hafoin ezerse nia-direitu votu iha Sentru Votasaun Balibar-Dili, tersa ne’e.

Notísia relevante: Manán iha Elpres, Ramos Horta fó prioridade restaura ordem konstitusional estadu

Prezidente Partidu CNRT, Kay Rala Xanana Gusmão. Imajen TATOLI/Egas Cristóvão.

Xanana Gusmão mós apela ba sidadaun hotu atu hakmatek liuliu kontribui ba pás no estabilidade hodi simu rezultadu eleisaun segunda volta ne’ebé povu rasik mak deside.

“Ha’u apela ba sidadaun sira atu hakmatek ho esperansa  katak sé mak lakon no mánan ne’e ita hotu nia Prezidente Repúblika.  Husu boot labele hamosu krize,” Lider Karismátiku ne’e apela.

Tanba, Prezidente Partidu CNRT ne’e dehan iha eleisaun ne’e votante ida-idak iha esperansa katak kandidatu ne’ebé mak mánan bele koopera malu ho ezekutivu sira hala’o dezenvolvimentu.

“Iha segunda volta husu ba Polisia Nasionál Timor Leste (PNTL) no FALINTIL-Forsa Defesa Timor-Leste (F-FDTL) no instituisuan relevante atu halo vijilánsia hodi hametin pás no dame atu  labele  mosu konflitu iha Timor Leste. Husu ba povu hotu  hakmatek iha segunda volta liuliu respeitu desizaun  povu nia atu labele mosu konflitu,” Xanana sujere.

Iha biban hanesan, Brigada Sentru Votasaun Balibar, Eulalia da Silva Soares, informa sentru votasaun Balibar hahú loke iha tuku 6:00, dader no tuku 7:00 hahú prosesu votasaun.

“Iha ne’e totál votante hamutuk 1.000, maibé balun ba rai liur no balun mate ona tanba iha primeira volta ami hetan votante 300-resin, agora ne’e ita la hatene iha segunda volta partisipasaun votante aumenta ou tun,”Brigada ne’e informa.

Tuir oráriu Sentru Votasaun Balibar prosesu votasaun sei termina iha tuku 3:00 lokraik, no hahú  kontajen votu hodi ramata iha tuku 18:00, kalan.

Eleisaun segunda volta iha sentru votasaun Balibar hetan observasaun hosi observadór nasionál no internasionál ekipa husi STAE no CNE no hetan seguransa  másimu  husi Polísia Nasionál Timor-Leste.

Notísia relevante: Lú Olo sei kumpre kompromisu hodi koopera ho órgaun soberania sira

Jornalista : Felicidade Ximenes

Editór      : Florencio Miranda Ximenes

PUBLISIDADE HUSI MTCIiklan

1 KOMENTÁRIU

  1. Hau tuur ela hau nia veranda, dere viola!

    Hau tuur ela hau nia veranda, dere viola
    Tau matan ba labarik sira nebe ba skola
    Maun boot ida, katuas, ussu esmola
    Bin tolu, tebe bola
    Tia Emilia, ba loja kaer sakola
    Marta emu coca cola
    Assu mutin ida iha rai, dolla
    Hau sinti hau nia zapato todan boot iha sola
    Hau hatama hau nia ain iha argola
    Moras labele terus, preciza ema ida hatu halksola
    Hau tuur ela hau nia veranda, dere viola!

    Mau Hananu Deit
    Pueta

HAKEREK NO HATÁN

Please enter your comment!
Please enter your name here