Diretór Jerál STAE, Acilino Manuel Branco. Imajen TATOLI/António Dasiparu.

DILI, 19 abríl 2022 (TATOLI)-Diretór Jerál Sekretariadu Téniku Administrasaun Eleitorál (STAE), Acilino Manuel Branco, informa observasaun STAE nian iha eleisaun prezidensiál (elprez) períudu 2022-2027 ba segunda volta iha territóriu nasionál no rai-li’ur la’o di’ak kompara ho primeira volta.

“Ami-nia observasaun katak prosesu hothotu la’o di’ak liu kompara ho eleisaun primeira volta, tanba iha primeira volta iha prokupasaun nomós lamentasaun públiku nian kona-ba sentru votasaun parelela maibé iha segunda volta ne’e la-rona ka la-rejista preokupasaun ligadu ho sentru votasaun paralela nian, iha de’it maka kestaun lojístika ida ka rua ne’ebé parese akontese iha Dili relasiona ho lista votante tanba ne’e maka iha menus lista votante hosi eleitór sira balun maibé depois tempu balun de’it kompleta kedas, akontesementu ne’e iha sentru votasaun Farol no Lahane Osidentál restu hosi ne’e laiha problema”, Diretór Jerál ne’e informa ba Agência TATOLI, iha edifísiu STAE, Kaikoli, tersa ne’e.

Nia hatutan, ofisiál STAE mós hala’o vizita ba iha sentru votasaun sira hotu iha Dili no mós munisípiu Likisá, haree katak iha antusiasmu tebes hosi eleitór sira ne’ebé mak partisipa, informasaun maihosi mós diretór munisípiu sira katak prosesu hothotu iha munisípiu sira la’o di’ak tebes inklui sentru votasaun sira iha prizaun sira hanesan prizaun Bekora, Kovalima no Glenu. Alende ne’e mós iha ospitál referál Baukau no Ospitál Nasionál Guido Valadares (HNGV, sigla portugés).

“Tuir ha’u-nia observasaun ida katak prosesu hothotu la’o di’ak tebes tanba to’o lorokraik besik tuku 17:00 otl kontazen iha sentru votasaun balun iha Dili hotu tiha ona no transporta tiha ona ba iha sentru apuramentu. Ne’e signifika prosesu hothotu ne’e la’o lalais tebes tanba parte hothotu ne’e kontribui, no dadaun ne’e tékniku sira iha sentru apuramentu munisípiu 12, Rejiaun Administrativu Espesiál Oé-cusse-Ambeno no diaspora preparadu hela atu-bele insert dadus ba iha sistema tabulasaun munisípiu nian atu nune’e iha kinta (21/04) prodús rezultadu provizóriu munisípiu nian no kontinua apuramentu nasionál”, nia haktuir.

Enkuantu, STAE seidauk bele halo konkluzaun ruma kona-ba taxa partisipasaun aas ou menus iha eleisaun segunda volta ne’e tanba prosesu sei la’o hela, agora dadauk kontazen iha sentru sira balun mós sei la’o hela, balun hotu ona hahú transporta ona ba iha sentru munisípiu sira hodi hahú introdús ba sistema ne’ebé mak iha, rezultadu provizória sai ba maka bele halo konkluzaun katak taxa partisipasaun ne’e menus ou aas kompara ho eleisaun primeira volta.

Notísia relevante: Governu apela líder komunitária mobiliza komunidade partisipa iha eleisaun segunda volta

Jornalista : Antónia Gusmão

Editora     : Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here