STAE Baucau hahú hala’o apuramentu munisipál ba eleisaun prezidensiál volta daruak. Imajen Tatoli/Natalino Belo.

BAUCAU, 19 marsu 2022 (TATOLI) – Sekretariadu Tékniku Administrasaun Eleitorál (STAE) Munisípiu Baucau hahú hala’o apuramentu munisipál iha oras 18: 00 hafoin akta hosi sentru votasaun hamutuk 34 tama iha salaun apuramentu.

Diretór STAE Baucau, Lúcio Freitas Salvador hateten, akta refere tama hosi postu Baucau vila, Quelicai, Vemasse no Venilale, enkuantu akta hosi postu Laga no Baguia seidauk tama iha apuramentu munisipál.

“Akta hamutuk 34 mak tama ona, tuir loloos akta lima tama ita hahú ona apuramentu maibé tanba sistema hosi nasionál loke tarde entaun ita hahú fali iha oras 18:38,” Diretór STAE Baucau hateten iha Vila Nova, sábadu ne’e.

Prosesu apuramentu kompostu hosi prezidente meza lideradu hosi Diretór STAE, superviziona hosi Diretór Komisaun Nasionál Eleisaun (CNE, sigla Portugés), envolve mós fiskál hosi kandidatu na’in-rua, observadór nasionál no internasionál no Polisía Nasionál Timor-Leste.

Daudaun ne’e totál akta ne’ebé tama ona iha STAE Baucau hamutuk sentru votasaun 34 kompostu sentru votasaun Haurobu mak tama uluk iha apuramentu iha oras 17:06, tuir kedas Uinamuboe, Ossouala, EBF Baha-sahe, Caibada tasi, Eskola Senkundária Santo António (ESSA) Teulale, Salari.

Nune’e mós Maukale, EBF Uatu-ua, EBF Osso-Ua, Buruma, Samalari, Seiçal, Uaiga’e, Uai-canse, EBF Caisido, Lamegua no seluk tán hosi totál sentru votasaun iha Baucau hamutuk 125 ne’ebé dijita ona hamutuk akta 15, seidauk dijita 110 hosi totál eleitór 96.207.

Entretantu, tabulasaun apuramentu munisipál Baucau provizoriumente kandidatu Prezidente Repúblika númeru sorteiu 2, Francisco Guterres ‘Lú Olo’  lidera ho 61,94% hosi votante 4.229 no kandidatu númeru sorteiu 1, José Manuel Ramos Horta okupa segundu lugár ho 38,06% hosi votante 2.599.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here