Prezidente Partidu CNRT, Kay Rala Xanana Gusmão. Imajen TATOLI/Egas Cristóvão.

DILI, 19 abríl 2022 (TATOLI)— Prezidente Partidu Kongresu Nasionál Rekonstrusaun Timor-Leste (CNRT) Kay Rala Xanana Gusmão, hateten Sekretáriu Jerál Partidu FRETILIN, Mari Alkatiri manda ona karta ba Partidu, ne’ebé atu hatan karta ne’e presiza iha desizaun koletiva hosi Partidu CNRT.

“Mari Alkatiri lori ona karta ba Partidu CNRT tanba ha’u la’ós manda partidu ne’ebé  ha’u tenke tuir partidu nia orientasaun, atu responde ou lae?,” Xanana Gusmão hateten iha Sentru Votasaun Balidar-Dili, tersa ne’e.

Notísia relevante: Mari Alkatiri: Líder nasionál presiza konsensu lori dezenvolvimentu ba oin

Iha ámbitu festa demokrasia ba Eleisaun Prezidensiál ne’e, Eis Primeiru Ministru, Mari Alkatiri, iha loron 16 abríl 2022 manda kart aba líder nasionál sira hodi hamutuk halo reflesaun no balansu dezempeñu hosi tinan 2002 too 2022.

Xanana dehan karta Mari Alkatiri ne’e atu ko’alia no halo reflesaun ho lideransa nasionál sira, maibé sei hein desizaun partidu CNRT nian molok resposta.

“Karta Mari Alkatiri nian ne’e, ha’u atu ko’alia lideransa nasionál sira, maibé ha’u moe fali. Ha’u husu deskulpa barak tanba la’ós lakohi, maibé ha’u mak sente-an fali tanba ha’u nivél la too sira ne’e,” Xanana deklara.

Mari Alkatiri dirije kart aba lideransa nasionál sira hanesan Eis Prezidente Repúblika Kay Rala Xanana Gusmão, José Ramos Horta, Francisco Guterres Lú Olo, Primeiru Ministru, Taur Matan Ruak no Tenente Jenerál Reformadu, Lere Anan Timur  no lideransa seluk tan.

Liu husi karta ne’e, Mari Alkatiri hateten : “Ita mós hatene katak durante tinan rua nulu nia laran, ita ida-idak, ativa ka pasivamente, simu pedidu atu kontribui iha konstrusaun Estadu no iha prosesu dezenvolvimentu politiku, sosiál, ekonómiku no finanseiru, no mós ba oinsá ita hatu’ur kuadru juridiku- institusionál ba Estadu Direitu Demokrátiku no mós iha planeamentu no programasaun ba governasaun Pas nian”.

Mari hateten, ho hanoin klean kona-ba situasaun preokupante ne’ebé sosiedade moris ohin loron no ho konxiensia tomak katak iha duni nesesidade atu haree fila fali oinsá serbí di’ak liu povu tomak.

Mari Alkatiri sente obrigadu atu defende katak too ona tempu atu tuur hamutuk hodi halo reflesaun kle’an kona-ba prosesu konstrusaun Estadu Timor-Leste durante tinan-20 liubá.

“Liuhosi ko’alia ba malu ne’ e, ita sei halo balansu objetivu kona-ba oinsá ita ida-idak kontribui ba prosesu konstrusaun Estadu Timor-Leste. Nu’udar lider, iha tempu naruk ka badak, ho rekursu barak liu ka menus, iha konjuntura ne’ebé de’it ho balansu ida ne’ebé sei halo analiza ho objetiva,” karta ne’e refere.

Alkatiri iha ninia karta ne’e dehan, “Ha’ u fiar katak ita sei hatene ho kle’an saida loos mak ita halo ona no hosi konkluzaun ne’e, ita bele haree hamutuk oinsá la’o ba oin ho ain metin ba futuru ida buras liu no di’ak liu”.

Notísia relevante: Karta husi Mari Alkatiri, Horta prontu hatan hodi halo reflesaun hamutuk  

Jornalista : Feliicdade Ximenes

Editór       : Florencio Miranda Ximenes

PUBLISIDADE HUSI MTCIiklan

1 KOMENTÁRIU

  1. Caro amigo!

    Espero que esta resposta acusando a recepcao da tua missiva, te va encontrar de perfeita saude, na companhia de todos os que te sao queridos.
    Infelizmente, atravessamos um momento importante, deveras historico da nossa Nacao e, como deves saber estamos bastante atarefados bem como o nosso Povo, na escolha do Seu futuro lider.
    Terminada a vindima e quando chegar a altura de lavar os cestos,
    faremo-lo juntos, para bem do Povo e a bem da Nacao.

    Abreijos
    Teu maun boot

HAKEREK NO HATÁN

Please enter your comment!
Please enter your name here