Ekipa STAE halo kontajen votu iha Sentru Votasaun Eskola Pre-Sekundária 30 Agostu, Comoro, Dili, tersa (19/04). Imajen Tatoli/Francisco Sony.

DÍLI, 19 abríl 2022 (TATOLI) – Kandidatu Prezidente Repúblika períodu 2022-2027 ho númeru sorteiu 1, José Ramos Horta, manán ho votu 669 iha suku Metiaut – iha sentru votasaun Eskola Bázika Filiál hamutuk 332 no sede suku 337.

Enkuantu kandidatu ho númeru sorteiu 2, Francisco Guterres ‘Lú Olo’ ho votu 403 iha sentru votasaun – Eskola Bázika Filiál hamutuk 274 no sede suku 129.

Tuir kontajen husi ofisiál eleitorál, totál nulu hamutuk neen, branku tolu, reklamadu no rezeitadu zero.

Totál votante iha suku Metiaut hamutuk 1.310, iha ne’ebé eleitór 649 ezerse direitu votu iha sede suku no 612 iha eskola refere. Na’in-49 mak la tuir votasaun iha segunda volta.

Sentru votasaun rua ne’e hetan monitorizaun husi observadór nasionál, internasionál, fiskál husi kandidatu sira, brigadista, ofisiál eleitorál husi Sekretariadu Tékniku Administrasaun Eleitorál no Komisaun Nasionál ba Eleisaun (CNE, sigla portugés) no hetan seguransa másima husi Polísia Nasionál Timor-Leste (PNTL).

Sekretariadu Tékniku Administrasaun Eleitorál (STAE) rejista 859.613 eleitór elejível iha territóriu nasionál no diáspora – 852.500 rejista iha nível nasionál no 7.113 iha estranjeiru.

Iha eleisaun primeira volta, kandidatu Prezidente Repúblika períodu 2022-2027, José Ramos Horta, manán ho votu 488 iha suku Metiaut no Francisco Guterres ‘Lú Olo’ ho votu 156 husi totál votante 1.309.

Notísia relevante: Horta manán iha suku Metiaut ho votu 488

Jornalista: Domingos Piedade Freitas

Editora: Maria Auxiliadora

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here