Votante Constâncio Suni hosi suku Costa, Sub-rejiaun Pante Makasar. Imajen Tatoli/Abílio Elo Nini.

OÉ-CUSSE, 19 abríl 2022 (TATOLI) – Votante sira hosi suku Costa, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA), rekomenda ba kandidatu Prezidente Repúblika períodu 2022-2027, bainhira eleitu ba xefe Estadu tenke serbisu hamutuk ho Governu atu garante pás no estabilidade hodi hadi’a povu nia moris.

Votante Constâncio Suni, hosi aldeia Sanane, husu kandidatu ne’ebé sai nu’udar xefe, labele ba partidu ka grupu ida, maibé importante liu mak garante pás no estabilidade nasaun nian.

“Ita-nia hakarak ne’e Timor-Leste labele repete tán buat-ne’ebé ita la gosta hanesan tempu pasadu, ita hakarak ne’e Timor komesa ohin ita determina ona destinu Estadu Timor-Leste, atubele mantein ho Repúblika Demokrátika Timor-Leste ida ne’e, ho pás no dame atu moris hakmatek,” Costansio Suni, espresa nia rekomendasaun hafoin ezersie nia direitu votu iha sentru votasaun eskola Filiál Masin, suku Costa, Oé-Cusse, tersa ne’e.

Nia rekomenda ba xefe Estadu foun presiza halo aprosimasaun ho Governu, nune’e programa prioridade ne’ebé  hato’o ona iha kampaña eleitorál tenke realiza, maibé kuandu la halo aprosimasaun Governu, entaun promesa ne’ebé nia halo iha kampaña eleitorál sei la realiza

“Maibé ida-ne’e ha’u hanoin prezidente foun mai ne’e, mesak esperiénsia boot no ita fi’ar katak bele realiza sira-nia promesa ne’ebé hato’o ona iha kampaña eleitorál,” nia espera.

Rekomendasaun hanesan hato’o hosi, Constâncio Ote, katak kandidatu na’in-rua futuru sai xefe Estadu, tenke asumi responsabilidade atu garante pás no dame, tenke kolabora ho Governu oinsá halo povu bele moris livre atu asesu ba merkadu hodi serbí povu nia hakarak.

Votante Constâncio Ote, hosi suku Bobometo, sub-rejiaun Oésilo. Imajen Tatoli/Abìlio Elo Nini.

“Eleisaun ida-ne’e, ha’u hanoin festa demokrasia ba povu tomak, tán ne’e ami iha esperansa katak kandidatu rua ne’e, ida kuandu eleitu ba prezidente repúblika tenke tau matan nafatin ba povu tanba xefe Estadu nu’udar aman ba ita-nia nasaun Timor-Leste,” nia sujere.

Juliana Correia, nu’udar sidadaun Timor-Leste votu ne’e importante atu deside aman nasaun ba tinan lima nian, atu serbí povu Timor-Leste.

“Ha’u-nia esperansa ba xefe Estadu ne’ebé atu eleitu iha eleisaun volta daruak ne’e, tenke tau matan ba povu kbiit laek iha baze, no haree situasaun povu nian atu moris iha pás, dame nomoos harii kontinuasaun ba dezenvolvimentu infraestrutura bázika hosi urbana liga ba suku, nune’e fasilita komunidade atu asesu ba setór hotu-hotu,” nia hato’o.

Tuir dadus totál eleitór iha suku Costa, sub-rejiaun Pante Makasar hamutuk 8.940, komposta hosi mane 4.657 no feto 4.283 mai hosi aldeia lima (5), aldeia Sanane, aldeia Mahata, aldeia Oétfo, aldeia Lakufoan no aldeia Oésono.

Ho totál sentru votasaun hamutuk tolu, iha aldeia Sanena hamutuk rua, sentru votasaun eskola Filiál Masin no sentru votasaun eskola EBC (sigla portugés) Palaban Um de Maio, no sentru votasaun iha aldeia Oésono.

Dadus hosi STAE katak eleitór ne’ebé partisipa iha eleisaun prezidensiál 19 abríl 2022, iha RAEOA hamutuk 51.495 komposta hosi mane 26.232, feto 25.263. iha eleisaun prezidensiál ne’e envolve brigadista na’in-60 no ofisiál eleitorál na’in-880, maibé iha eleisaun volta dahuluk STAE rejista votante 12.523 mak konsege tuir votasaun.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here