Kondisaun estrada liga hosi suku Manapa ba Postu administrativu, Cailaco Villa. Imajen Tatoli/Sérgio da Cruz.

BOBONARO, 19 abríl 2022 (TATOLI) – Xefe suku Manapa, postu administrativu Cailaco, munisípiu Bobonaro, Jeferino Loco-Bere, husu kandidatu Prezidente Repúblika (PR) ne’ebé eleitu tenke serbisu hamutuk ho Governu hodi aselera prosesu dezenvolvimentu ba povu no nasaun.

“Ha’u hanesan autoridade lokál reprezenta komunidade sira iha esperansa ba Prezidente Repúblika eleitu tenke sai prezidente ba nasaun Repúblika Demokratika Timor-Leste la haree ba kór no partidu polítiku, maibé tenke serbisu hamutuk ho governu atu halo dezenvolvimentu ba ria ida-ne’e tanba nia mak sai aman ba nasaun iha obrigasaun atu hadi’a povu nia moris,” nia informa ba Agência Tatoli, iha Cailaco, tersa ne’e

Nia dehan, eleisaun ne’e nu’udar kompetisaun demokrasia nune’e manán ka lakon povu mak deside, maibé importante liu mak garante pás, establidade no apoia ideia ba malu hodi hadi’a povu nia moris sai hosi kiak no mukit.

“Ha’u nu’udar líder komuntáriu mensajen ba xefe estadu eleitu mak, bainhira povu fó fiar tenke ko’alia ho governu atu haree ba nesesidade povu nia hanesan estrada diresaun hosi Maliana mai to’o Cailaco, liga mós ba munisípiu Ermera, ne’ebé durante ne’e estadu nunka tau matan, depois bee-moos to’o agora sai preokupasaun komunidade, inklui mós  eletrisidade tanba iha Cailaco ne’e suku hitu seidauk asesu,” nia hateten.

Tuir observasaun Agência Tatoli, iha sentru votasaun sede suku Manapa, postu administrativu Cailaco, hahu hosi tuku 06:00 dadeersan eleitór sira entusiazmu tebes ezerse sira-nia direitu votu no iha prosesu eleisaun ne’e  la’o-tuir protokolu saúde tanba bainhira eleitór sira atu hakat tama fatin votasaun, ofisiál eleitorál sira mós fahe máskara hodi evita transmisaun pandemia Covid-19.

Tuir dadus hosi Sekretariadu Tékniku Administrasaun Eleitorál (STAE) Munisípiu Bobonaro hamutuk na’in-70,283, ho totál sentru votasaun 130 no estasaun votasaun 150, ne’ebé envolve brigadista na’in-150 no ofisiál eleitorál na’in-1,500.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here