Sekretáriu Jerál CMCLN Baucau, Manuel Alari da Costa Soares. Imajen Tatoli/Natalino Belo.

BAUCAU, 19 abríl 2022 (TATOLI) – Povu munisípu Baucau nia esperansa ba Prezidente Repúblika foun atu hala’o diálogu ho kualkér entidade nune’e solusiona impase polítiku ne’ebé nasaun ne’e enfrenta.

Sekretáriu Jerál Konsellu Munisipál Kombatente Libertasaun Nasionál Baucau (CMCLN, sigla Portugés), Manuel ‘Alari’ da Costa Soares, hateten prezidente eleitu sai líder ba povu hotu nu’udar patrimóniu estadu tanba ne’e importante mak bainhira eleitu hadi’a no muda inklui kore situasaun krize ekonomia ne’ebé daudaun ne’e nasaun enfrenta.

“Ita-nia esperansa ba prezidente eleitu iha volta daruak ne’e sai prezidente ba ita hotu tanba ne’e ema hotu liuliu veteranu sira tenke hatene no domina-aan, tenke fó ezemplu di’ak ba eleitór sira, tanba prezidente repúblika líder ba povu hotu,” Sekretáriu Jerál CMCLN Baucau informa ba Agência Tatoli iha Vila Antinga, tersa ne’e.

Alari husu ba prezidente eleitu atu hala’o diálogu ho kualkér entidade hotu hanesan governu, parlamentu nasionál no partidu polítiku hotu atu hamutuk fó atensaun no solusiona problema sira hanesan sitausaun seguransa no defeza, ekonomia no sosiál.

CMCLN nafatin firme atu kolabora no fó hanoin ba prezidente repúblika hanesan parte hosi kontribusaun tuir kbiit no kapasidade atu hamutuk rezolve situasaun povu nian.

Eleitór Baucau, Domingos Ki’ik Oan. Imajen Tatoli/Natalino Belo.

Eleitór hosi postu Quelicai hanesan mós veteranu, Domingos ‘Ki’ik-Oan’ hateten entre kandidatu na’in-rua mesak timor-oan ne’ebé sai líder nasionál antes ona no iha kapasidade no koñesimentu iha área diferente maibé bainhira eleitu tenke sai prezidente repúblika ba povu tomak.

Importante mak bainhira eleitu ona nu’udar xefe estadu tenke komprende loloos ninia funsaun atu kumpri de’it konstitusaun nune’e bele serbisu hamutuk órgaun soberania sira seluk liuliu garante pás no estabilidade iha rai-laran.

“Kuandu prezidente repúblika komprende ninia funsaun loloos, bele ona garante seguransa iha rai-laran atu buat hotu la’o di’ak,” Domingos Ki’ik Oan akresenta.

Xefe Departementu Rekursu Umanu HorEX Baucau, Sebastião Amaral. Imajen Tatoli/Natalino Belo.

Xefe Departamentu Rekurusu Umanu HoREX Baucau, Sebatião Amaral, hateten entre kandidatu na’in-rua ne’e iha kapasidade hotu no merese atu sai líder ba estadu Timor-Leste, maibé importante mak serbí ba povu durante mandadu nu’udar xefe estadu.

Sebastião Amaral husu prezidente eleitu atu fó prioridade ba infraestrutura saúde no rekurusu umanu nune’e bele rezolve problema saúde iha Timor-Leste.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here