Pasiente no profisionál saúde iha RAEOA konsege ezerse direitu votu. Imajen mídia STAE.

OÉ-CUSSE, 19 abríl 2022 (TATOLI) – Pasiente hamutuk ho profisionál saúde hamutuk na’in-27 hosi Rejiaun Administrativa Espesiál Oé-Cusse Ambeno (RAEOA) konsege ezerse sira-nia direitu votu iha sentru votasaun ambulante iha Hospitál Referál Oé-Cusse (HRO).

Diretora Sekretariadu Tékniku Administrasaun Eleitorál (STAE) Oé-Cusse, Luiza da Costa, hateten, dadus dahuluk STAE simu lista iha semana ida antes, hosi Hospitál Referál Oé-Cusse hamutuk na’in-52, maibé iha loron tolu besik loron eleisaun balu alta tiha, nune’e hela 27 mak kontinua halo tratamentu iha hospitál refere.

“Ohin ekipa eleitorál lori urna ho materiál sensitivu ba iha hospitál, pasiente ho doutór no infermeira sira na’in-27 konsege ezerse sira-nia direitu votu iha sentru votasaun ambulante tuir votu internadu nian,” Luiza da Costa, informa ba Agência Tatoli iha Palaban, Oé-Cusse, tersa ne’e.

Tuir nia, iha lista dahuluk STAE simu iha semana kotuk, hamutuk na’in-52, maibé to’o eleisaun balu alta no fila ona iha idak-idak nia suku no aldeia hodi tuir votasaun, tán ne’e hela na’in-27 mak sei kontinua halo tratamentu iha Hospitál Referál Oé-Cusse.

“Lista ohin na’in-27 ne’e maioria pasiente, hamutuk ho doutór no enfermeira ne’ebé akompaña sira-nia saúde, inklui família akompaña pasiente na’in-ida (1), ba sentru votasaun movel Oé-Cusse laiha, só sentru votasaun ambulante ida mak iha hospitál,” nia katak.

Nia informa, iha prosesu votasaun ne’e la’o ho transparánsia tanba brigadista mak responsável ba prosesu tomak, maibé hetan seguransa másima hosi Polísia Nasionál Timor-Leste (PNTL).

Nune’e mós hetan observasaun hodi Komisaun Nasionál Eleisaun (CNE, sigla portugés) no observadór internasionál hosi Uniaun Europeia (UE) no akompaña direita hosi fiskál kandidatura na’in-rua nian.

Tuir dadus hos STAE totál eleitór ne’ebé partisipa iha eleisaun prezidensiál 19 abríl 2022, iha RAEOA hamutuk 51.495 komposta hosi mane 26.232 no feto 25.263. Iha eleisaun ne’e envolve brigadista na’in-60 no ofisiál eleitorál na’in-880.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here