Xefe Misaun, Domènec Ruiz Devesa. Imajen Tatoli/António Dasiparu.

DILI, 19 abríl 2022 (TATOLI) – Ekipa 20 husi Misaun Observadór Eleitorál ba Uniaun Europeia (MOE-UE) halo  observasaun ba abertura sentru votasaun 18 ne’ebé hatudu rezultadu pozitivu tanba loke tuir oráriu no iha partisipasaun másima husi eleitór sira.

“Ami haree sentru votasaun hirak ne’e organizadu loos, materiál eleitorál esensiál, ofisiál sira no CNE ne’ebé halo monitorizasaun mós marka prezensa”, informa Xefe Misaun, Domènec Ruiz Devesa, ba jornalista sira iha konferénsia imprensa ne’ebé hala’o iha Eskola 10 de Dezembru, Comoro, ohin.

“Ami observa katak seidauk rejista keixa formál ruma”, nia akresenta.

Hodi hatutan, iha loron eleisaun ne’e, ekipa sei halo observasaun ba sentru votasaun hamutuk 100-resin iha territóriu tomak.

Kona-ba medida prevensaun ba covid-19, responsável ne’e nota katak “en jerál iha sentru votasaun laran kumpre regra, maibé iha li’ur ema ladún halo tuir”.

Domènec afirma tan katak molok hahú votasaun, observadór UE nota “irregularidade prosesuál ki’ik balu iha ne’ebé totál boletin votu la rejista iha akta”.

Misaun ne’e iha Timor-Leste hahú kedas iha fevereiru no halo ona observasaun ba eventu eleitorál hamutuk 200 iha períodu kampaña no halo mós entrevista ho lokutór rihun ida.

Tuir oráriu, misaun ne’e sei hato’o, aban, iha Hotel Timor, deklarasaun preliminár kona-ba eleisaun prezidensiál. Ekipa ne’e sei kontinua hela iha Timor-Leste to’o prossesu eleitorál ne’e remata.

Jornalista: Afonso do Rosário

Editora: Maria Auxiliadora

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here