Sekretáriu Jerál Partidu FRETILIN, Mari Alkatiri, ezerse ona nia direitu votu iha Sentru Votasaun Eskola Ensinu Bázika Númeru 1 Faról Dili, tersa (19/04). Imajen Tatoli/Francisco Sony

DILI, 19 abríl 2022 (TATOLI)—Sekretáriu Jerál Partidu Frente Revolsionáriu Indepedente (FRETILIN), Mari Alkatiri, hateten lidér nasionál sira presiza halo konsensu hodi lori dezenvolvimentu nasaun ne’e ba oin.

“Atu dezenvolvimentu Timor-Leste la’o ba oin ne’e, líder nasionál sira presiza halo konsensu hodi haree ba laron aban nian,” Alkatiri hato’o lia hirak ne’e hodi responde Agência Tatoli, hafoin ezerse direitu votu hodi akompaña kandidatu Prezidente Repúblika, Francisco Guterres Lú Olo, vota iha sentru votasaun Eskola Ensinu Báziku númeru 1 Faról, Dili, tersa ne’e.

Hatán kona-ba bainhira kandidatu PR hosi partidu Fretilin ne’e lakon iha eleisaun prezidensiál reflesaun saida mak presiza halo hosi partidu, nia hatán, sira-nia parte servisu ne’ebé halo mak atu manán no lakohi lakon no Fretilin sempre uluk kedas tama iha luta atu manán.

“Ha’u lakoi admite tanba Fretilin iha istória tomak tempu lakon buka manán fali no Fretilin garante pás no estabilidade iha Timor-Leste. Maibé bainhira lakon ka manán hanesan hotu-hotu hatene ha’u hakerek karta ba Xanana ho líder na’in-haat tenke tuur hamutuk buka konsensu ida ne’e mak ha’u nia kontribuisaun bele hateke ba futuru,” nia hateten.

Mari nia karta ne’e hakerek hodi dirije ba líder nasionál hanesan Francisco Guterres Lú Olo, José Manuel Ramos Horta, Taur Matan Ruak ho Tenente Jenerál Reformadu, Lere Anan Timur, no nia hein katak tempu oin mai lidér sira bele hasoru malu tanba tempu ona atu hamutuk hodi ko’alia ba malu.

“Se Xanana seidauk lee ha’u-nia karta, ha’u fiar sira na’in-haat lee ona,” nia dehan.

Sekretáriu Jerál Partidu Fretilin ne’e lakohi ko’alia kona-ba konteúdu karta ne’ebé hakerek no dirije ba lidér nasionál sira seluk ne’e.

“Karta ne’e ha’u hakerek la’ós hanesan Sekretáriu Jerál ne’ebé públika ona iha mídia sosiál de’it, ha’u la esplika maibé imi (jornalista) ba lee de’it,” nia dehan.

Entertantu, tuir konteúdu karta Mari Alkatiri nian ne’ebé Tatoli sita hosi nia pajina rede sosiál (facebook) reflesaun no balansu dezempeñu durante tinan 2002-2022.

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

1 KOMENTÁRIU

  1. Eleisaun dadaun Povu sei fo konsensu!

    Eleisaun dadun Povu sei fo konsensu
    Nebe manan Povu sei fo hatene
    La iha konfusaun iha impressu
    Povu oin loron sai matenek

    Konsensu ida nee, konsensu diak liu
    Keta mai nunguranga horas importante iha vida Nasaun
    Povu ne konsensu maka furak liu
    Imi hotu hau usso kompreensaun

    Tuir los imi katuas bele ba deskansa
    Fo fatin ba alin sira mateneke no maturo tia ona
    Maun boot sira bele ba dansa
    Buat nebe hau tau iha poezia, imi tenke rona

    Hau sai kontente ba ita nia Povu
    Iha Rai Doben Timor Loro Sae
    Sira mateneke, maturo, lori sassan novu
    Katuas sira serbisu hotu ona, ba deskansa lai

    Mau Lissan Makas
    Pueta

HAKEREK NO HATÁN

Please enter your comment!
Please enter your name here